Wararka24: Wararka naga soo gaaraya magaalada Dhuusamareeb ayaa sheegaya in horumar laga sameeyay wada-hadallada u dhexeeya Dowladda Federaalka Soomaaliya iyo Madaxweynaha Galmudug, Axmed Cabdi Kaariye (Qoor Qoor), kuwaas oo diiradda lagu saarayo arrimaha doorashooyinka iyo xaaladda siyaasadeed ee maamulka.
Kulamadan oo maray dhowr wareeg ayaa waxaa hoggaaminayay wafdi ka socday dowladda federaalka oo uu qayb ka ahaa Taliyaha Hay’adda Nabad Sugidda iyo Sirdoonka Qaranka (NISA), Mahad Salaad. Ilo xog ogaal ah ayaa sheegay in labada dhinac ay gaareen isfaham hordhac ah oo la xiriira qodobadii ugu muhiimsanaa ee laga wada hadlayay.
Wararka ayaa intaasi ku daraya in Ra’iisul Wasaaraha Soomaaliya, Xamza Cabdi Barre, la filayo inuu saacadaha soo socda gaaro Dhuusamareeb si uu uga qayb qaato dhammeystirka wada-hadallada iyo hirgelinta is-afgaradka la gaaray. Socdaalkiisa ayaa lagu wadaa inuu qeyb ka noqdo dadaallada lagu xallinayo xiisadaha siyaasadeed ee ka jira Galmudug.
Magaalada Dhuusamareeb ayaa sidoo kale laga dareemayaa diyaar-garow xooggan oo lagu soo dhaweynayo Ra’iisul Wasaaraha iyo wafdigiisa. Ammaanka magaalada ayaa si weyn loo adkeeyay, iyadoo ciidamo dheeraad ah la geeyay goobaha muhiimka ah si loo xaqiijiyo nabadgelyada.
Dowladda Federaalka ayaa la sheegay inay dooneyso in doorashada madaxtinimada Galmudug ee la filayo inay qabsoonto bisha July ay ku dhacdo jawi siyaasadeed oo deggan, iyadoo sidoo kale ay jiraan warar ku saabsan musharrixiin cusub oo loo saadaalinayo inay ka qeyb galaan tartanka.
Dadka reer Galmudug ayaa si dhow ula socda natiijada wada-hadalladan, maadaama ay muhiim u yihiin mustaqbalka siyaasadeed ee maamulka. Dad badan ayaa rajeynaya in is-afgaradka socda uu horseedo xasillooni siyaasadeed iyo doorasho lagu wada qanacsan yahay.
Wada-hadalladan ayaa kusoo aadaya xilli ay dowladda federaalka dadaal ugu jirto hirgelinta qorshaheeda la xiriira doorashooyinka dalka, iyadoo dhawaan isbeddel siyaasadeed uu ka dhacay maamulka Koonfur Galbeed.
