Wararka24: Taliyaha Hay’adda Sirdoonka iyo Nabadsugidda Qaranka (NISA), Mahad Maxamed Salaad, ayaa gaaray guriga uu deganaa Ra’iisul Wasaarihii hore ee Soomaaliya, Xasan Cali Khayre, ee degmada Howlwadaag, halkaas oo ay ka dhaceen dagaallo culus oo dhex maray ciidamo la sheegay inay daacad u yihiin Khayre iyo ciidamada dowladda.
Mahad Salaad ayaa goobta kula kulmay xildhibaanno, waxgarad iyo mas’uuliyiin kale oo ku howlanaa dadaallada lagu dejinayo xaaladda. Wararka ayaa sheegaya inuu ka qeyb galay wada-hadallo lagu raadinayo xal lagu qaboojinayo xiisadda ka dhalatay dagaalka.
Kulamada ayaa waxaa sidoo kale ka qeyb galay Xasan Macallin, Ugaaska Beesha Murusade iyo xubno kale oo ka tirsan bulshada, kuwaas oo ka arrinsanayay sidii loo xoojin lahaa dadaallada nabadeed.
Sida wararku sheegayaan, waxaa socda dadaallo lagu qancinayo Xasan Cali Khayre inuu ka guuro hoygii uu deganaa ee Howlwadaag kuna laabto gurigiisa ku yaalla deegaanka Hotel Jazeera, iyadoo amniga goobta ay sugayaan ciidamada NISA.
Xaaladda degmada Howlwadaag ayaa la sheegay inay hadda deggan tahay marka loo eego saacadihii dagaalka uu socday. Ciidamada dowladda ayaa la sheegay inay si buuxda ula wareegeen amniga aagga, halkaas oo habeenkii hore ay ka dhaceen iska horimaadyo sababay cabsi iyo barakac.
Muuqaallo lagu baahiyay baraha bulshada ayaa muujinaya burbur soo gaaray qaar ka mid ah dhismayaasha ku yaalla goobihii dagaalka. Wararka ayaa tilmaamaya in dagaalka lagu isticmaalay hub culus iyo madaafiic, inkastoo aan weli si rasmi ah loo xaqiijin khasaaraha guud ee ka dhashay.
Dhanka kale, waxaa sii kordhaya baaqyada ka imanaya beesha caalamka, gaar ahaan dowladaha Mareykanka iyo ingiriska, kuwaas oo ku baaqay in la joojiyo colaadda laguna xalliyo khilaafaadka wada-hadal.
Ilaa hadda waxaa socda dadaallo lagu doonayo in lagu dejiyo xiisadda Muqdisho, iyadoo indhaha lagu hayo natiijada wada-hadallada iyo tallaabooyinka ay qaadi doonaan dhinacyada ku lugta leh khilaafka.
