Maamulka Koonfur Galbeed ayaa ku dhawaaqay bandow habeenkii ah oo laga hirgelinayo magaalada Baydhabo, iyadoo tallaabadan lagu sheegay mid lagu xaqiijinayo amniga xilli lagu jiro diyaar-garowga doorashooyinka maamulka.
Wasiirka Amniga Koonfur Galbeed, Maxamed Xuseen Xasan (Joon), ayaa shir jaraa’id ku sheegay in bandowgu uu bilaabanayo 7:00 fiidnimo isla markaana uu socon doono ilaa salaadda subax. Inta uu bandowgu jiro waxaa la joojinayaa isu socodka guud ee magaalada.
Mas’uuliyiinta ayaa sheegay in ujeeddada go’aankan ay tahay sugidda amniga iyo ilaalinta jawi deggan oo loogu diyaar garoobo doorashada guddoonka baarlamaanka iyo tan madaxweynaha maamulka Koonfur Galbeed.
Sidoo kale, maamulka ayaa mamnuucay in hub lagu dhex qaato magaalada, iyadoo la adkeeyay tallaabooyinka lagu xakameynayo falalka amni darrada iyo wax kasta oo carqaladeyn kara geeddi-socodka doorashada.
Wasiirka ayaa ugu baaqay shacabka inay u hoggaansamaan awaamiirta cusub ayna la shaqeeyaan ciidamada ammaanka si loo ilaaliyo nabadda iyo xasilloonida magaalada.
Magaalada Baydhabo waxaa hadda si weyn uga howlgala ciidamada Dowladda Federaalka Soomaaliya iyo kuwa Koonfur Galbeed, kuwaas oo wada howlgallo lagu xaqiijinayo amniga gudaha magaalada iyo daafaheeda.
Tallaabadan ayaa kusoo aadaysa maalmo kadib markii magaalada ay ka dhaceen iska horimaadyo u dhexeeyay ciidamada dowladda iyo ciidamo daacad u ah madaxweynihii hore ee Koonfur Galbeed, Cabdicasiis Xasan Maxamed (Lafta-gareen), kuwaas oo markii dambe dib looga saaray magaalada.
Daawo
