Wararka24: Maxkamadda Sare ee Soomaaliya ayaa maanta si rasmi ah u ansixisay natiijada doorashooyinkii goleyaasha deegaanka iyo Golaha Wakiillada ee dhawaan ka dhacay maamulka Koonfur Galbeed. Go’aankan ayaa yimid kadib fadhi ay yeesheen garsoorayaasha qeybta doorashooyinka ee maxkamadda.
Go’aanka ansixinta waxaa saxiixay dhammaan xubnaha guddiga garsoorka ee kiiska gacanta ku hayay. Maxkamaddu waxay sheegtay in natiijadii horay ay ugu dhawaaqeen Guddiga Madaxbannaan ee Doorashooyinka Qaranka iyo Soohdimaha hadda noqotay mid kama dambeys ah oo sharci ahaan la meel mariyay.
Sida ku cad go’aanka maxkamadda, muddadii loo asteeyay gudbinta cabashooyinka doorashada laguma helin dacwad rasmi ah oo ka dhan ah natiijada la shaaciyay. Taasi ayaa sahashay in maxkamaddu si toos ah u ansixiso doorashada iyadoo raaceysa qodobbada sharciga doorashooyinka qaranka.
Doorashada ayaa dhacday 10-kii May 2026, waxaana ka qeyb galay 32 urur siyaasadeed oo ku tartamay kuraasta Golaha Wakiillada. Guddiga doorashooyinka ayaa sheegay in in ka badan 132 kun oo qof ay codkooda dhiibteen intii ay socotay doorashadu.
Golaha Wakiillada Koonfur Galbeed ayaa ka kooban 95 kursi. Natiijada la ansixiyay ayaa muujisay in ururka JSP uu helay 51 kursi, taasoo siisay aqlabiyadda kuraasta golaha. Ururka NPU ayaa galay kaalinta labaad isagoo helay 14 kursi, halka ururrada kale ay qaybsadeen kuraasta haray.
Ansixinta maxkamadda ayaa kusoo aadeysa xilli ay weli taagan yihiin dooddo siyaasadeed oo ku saabsan hannaanka doorashooyinka dalka iyo marxaladda kala guurka ee Soomaaliya. Qaar ka mid ah xoogagga mucaaradka iyo maamullada Puntland iyo Jubbaland ayaa hore u muujiyay diidmo ku aaddan doorashooyinka cusub iyo habka loo maamulay.
Go’aanka maanta kasoo baxay Maxkamadda Sare ayaa hadda si rasmi ah u soo xiraya marxaladda sharci ee doorashada Koonfur Galbeed, iyadoo la filayo in maamulka uu guda galo tallaabooyinka xiga ee dhismaha hay’adaha cusub ee la doortay.
