Wararka24: Beesha caalamka ayaa walaac ka muujisay xaaladda siyaasadeed ee Soomaaliya, iyadoo ugu baaqday madaxda iyo dhinacyada siyaasadda inay dib ugu laabtaan wadahadal si loo gaaro hannaan doorasho oo lagu wada qanacsan yahay.
War-saxaafadeed wadajir ah oo la soo saaray 1-da June 2026 ayaa lagu sheegay in xaaladda taagan ay u baahan tahay deganaan, tanaasul iyo wadahadal miro-dhal ah. Saxiixayaasha bayaanka ayaa ku boorriyay dhammaan dhinacyada inay mudnaanta siiyaan danta qaranka iyo xasilloonida dalka.
Bayaanka ayaa xusay in loo baahan yahay heshiis degdeg ah oo ku saabsan khariidadda doorashada, si shacabka Soomaaliyeed loogu horseedo geeddi-socod siyaasadeed oo la isku raacsan yahay. Waxa kale oo lagu caddeeyay in beesha caalamku diyaar u tahay taageeridda wadahadal kasta oo ay Soomaalidu hoggaaminayso.
Dhinacyada saxiixay bayaanka waxaa ka mid ahaa hay’adaha iyo dalalka taageera Soomaaliya, kuwaas oo si gaar ah uga digay tallaabooyin keeni kara xiisad horleh ama khilaafka sii xumeeya.
Dhanka kale, dowladda Mareykanka ayaa iyaduna soo saartay farriin gaar ah oo ay ugu baaqday dhammaan daneeyayaasha siyaasadda Soomaaliya inay muujiyaan is-xakameyn, kana fogaadaan ficillo horseedi kara rabshado ama qalalaase siyaasadeed.
Baaqyadan ayaa kusoo aadaya xilli uu weli taagan yahay muranka ka dhashay arrimaha doorashooyinka, wax-ka-beddelka dastuurka iyo mustaqbalka hay’adaha federaalka. Dowladda Federaalka Soomaaliya ayaa ku adkeysanaysa hirgelinta doorasho qof iyo cod ah, halka mucaaradka iyo qaar kamid ah dowlad-goboleedyada ay dalbanayaan in marka hore la gaaro heshiis siyaasadeed oo ballaaran.
Xiisadda siyaasadeed ee sii xoogeysanaysa ayaa kusoo beegmaysa xilli dalka uu wajahayo caqabado amni, dhaqaale iyo kuwo bini’aadantinimo, taas oo sare u qaadday walaaca laga qabo in khilaafka siyaasadeed uu saameyn ku yeesho xasilloonida guud ee dalka.
Beesha caalamka ayaa ku celisay baaqeeda ah in dhammaan dhinacyadu ka shaqeeyaan wada-hadal iyo is-afgarad, si looga fogaado xaalado keeni kara dib-u-dhac siyaasadeed ama amni darro cusub.
War-saxaafadeedka wadajirka ah
