Wararka24: Xubnaha cusub ee Golaha Wakiillada Dowlad-goboleedka Koonfur Galbeed ayaa maanta si rasmi ah u guda galay waajibaadkooda shaqo, kadib markii shalay lagu dhaariyay magaalada Baydhabo ee xarunta gobolka Baay.
Munaasabadda dhaarinta ayaa waxaa ka qeyb galay mas’uuliyiin ka tirsan maamulka Koonfur Galbeed, xubno ka socday Dowladda Federaalka Soomaaliya, odayaal dhaqameedyo, bulshada rayidka ah iyo marti-sharaf kale. Xildhibaannada ayaa lagu dhaariyay inay gutaan waajibaadka dastuuriga ah ee loo igmaday.
Hoggaamiyaha ku-meel-gaarka ah ee Koonfur Galbeed, Jibriil Cabdirashiid Xaaji, ayaa ugu baaqay xildhibaannada cusub inay si hufan oo masuuliyad leh u gutaan shaqadooda, isla markaana mudnaan siiyaan danaha shacabka iyo horumarinta hay’adaha dowladeed.
Wuxuu sidoo kale carrabka ku adkeeyay muhiimadda ay leedahay in Golaha Wakiilladu door muuqda ka qaataan arrimaha amniga, horumarinta adeegyada bulshada iyo xoojinta geeddi socodka dowlad-dhiska ee maamulka Koonfur Galbeed.
Mas’uuliyiinta ka qeyb galay munaasabadda ayaa bogaadiyay habsami u socodka dhaarinta, iyagoo ku tilmaamay tallaabo muhiim ah oo qeyb ka ah dhismaha hay’adaha sharci-dejinta iyo sii wadista hannaanka siyaasadeed ee maamulka.
Dhaarinta xildhibaannadan cusub ayaa kusoo beegantay xilli magaalada Baydhabo ay ka taagan yihiin xiisado siyaasadeed iyo kuwo amni, kadib dagaallo iyo muranno la xiriira hoggaanka maamulka Koonfur Galbeed.
Sidoo kale, waxaa la filayaa in maalmaha soo socda la guda galo doorashada guddoonka Baarlamaanka iyo tan madaxweynaha Koonfur Galbeed, taas oo si weyn isha loogu hayo maadaama ay saameyn ku leedahay mustaqbalka siyaasadeed ee maamulka.
