Wararka24: Mas’uul sare oo ka tirsan maamulka Somaliland ayaa sheegay in Hargeysa ay diyaar u tahay inay xoojiso iskaashiga amni iyo difaac ee kala dhexeeya dowladda Israel, iyadoo diiradda la saarayo amniga marin biyoodka muhiimka ah ee Bab al-Mandab.
Mas’uulkan oo la hadlay warbaahinta Israel ayaa sheegay in khataraha ka imanaya dhinaca Yemen, gaar ahaan weerarrada lagu hayo maraakiibta caalamiga ah, ay Somaliland ku riixi karaan inay ballaariso xiriirkeeda dhinaca amniga iyo difaaca.
Wuxuu xusay in Somaliland ay horey iskaashi ula leedahay dalal ay ka mid yihiin Mareykanka iyo Imaaraadka Carabta, kuwaas oo dano ganacsi iyo istaraatiiji ah ku leh dekedda Berbera, isla markaana ay suuragal tahay in iskaashi la mid ah lala yeesho Israel.
Bab al-Mandab ayaa ah marin biyood muhiim u ah isku socodka ganacsiga caalamiga ah, gaar ahaan maraakiibta shidaalka iyo badeecadaha. Xiisadaha sii kordhaya ee Badda Cas iyo weerarrada ay geystaan xoogagga Xuutiyiinta ayaa sare u qaaday muhiimadda amniga marinkan.
Somaliland ayaa muddo dheer raadineysay aqoonsi caalami ah tan iyo markii ay ku dhawaaqday inay ka go’day Soomaaliya sanadkii 1991. Dowladda federaalka Soomaaliya ayaa weli ku adkeysaneysa in Somaliland ay qeyb ka tahay dhulka Jamhuuriyadda Federaalka Soomaaliya.
Hadalkan cusub ayaa kusoo aadaya xilli gobolka Geeska Afrika iyo Badda Cas ay ka jiraan xiisado amni iyo loollan siyaasadeed oo sii xoogeysanaya, iyadoo dhinacyo badan ay isku dayayaan inay xoojiyaan saameyntooda istaraatiijiyadeed ee marin-biyoodyada muhiimka ah.
