Wararka24: Mareykanka ayaa sheegay inuu duqeyn cirka ah ka fuliyay buuraha Calmiskaad ee gobolka Bari, halkaas oo ay ku sugan yihiin dagaalyahanno ka tirsan Daacish. Weerarkan ayaa lagu sheegay mid lagu beegsaday fariisimo ay kooxdaasi ku lahayd deegaankaasi.
Taliska AFRICOM ayaa warsaxaafadeed uu soo saaray ku xaqiijiyay in howlgalka uu ka dhacay deegaan qiyaastii 46 mayl u jira koonfur bari magaalada Bosaso. AFRICOM ayaa sheegtay in bartilmaameedku ahaa garabka Daacish ee ka dagaallama Puntland.
War saxaafadeedka taliska ma uusan bixin faahfaahin dheeraad ah oo ku saabsan khasaaraha ka dhashay duqeynta, mana shaacin tirada dagaalyahannada la beegsaday. Sidoo kale, AFRICOM waxay joojisay sanadkii hore inay si rasmi ah u soo bandhigto qiimeynta khasaaraha rayidka.
Duqeyntan ayaa noqoneysa weerarkii 62-aad ee Mareykanka ka fuliyo gudaha Soomaaliya sanadkan, taasoo muujinaysa kororka howl gallada cirka ee ka dhanka ah kooxaha hubeysan, gaar ahaan Daacish iyo Al-Shabaab.
Kororka weerarradan ayaa yimid kadib markii maamulka Donald Trump uu dabciyay qaar ka mid ah xeerarka la xiriira howl gallada milatari, taasoo fududeysay fulinta duqeymaha diyaaradaha aan duuliyaha lahayn iyo weerarrada degdegga ah ee ka baxsan goobaha dagaalka ee caadiga ah.
Buuraha Calmiskaad ayaa bilihii lasoo dhaafay ahaa goob dagaallo culus ay ka socdeen, iyadoo ciidamada Puntland ay wadeen guluf ka dhan ah kooxaha Daacish ee halkaasi ku dhuumaaleysanaya.
