Wararka24: 19-02-2026 Wasiirka Arrimaha Dibadda ee Masar Badr Abdel Aty iyo dhiggiisa Mareykanka Marco Rubio ayaa yeeshay wada-hadal dhanka taleefanka ah oo ay kaga hadleen xaaladda Soomaaliya iyo xasilloonida Geeska Afrika.
Sida ay warbaahinta Masar sheegtay, wasiirka Masar ayaa muujiyay taageerada dalkiisa ee ilaalinta madax-bannaanida, midnimada iyo xasilloonida Soomaaliya.
Badr Abdel Aty ayaa sidoo kale ka hadlay arrimaha la xiriira sheegashada aqoonsiga Somaliland ay ka heshay Israel, isagoo ku tilmaamay tallaabo jebinaysa sharciga caalamiga ah isla markaana khatar ku ah xasilloonida gobolka iyo Badweynta Cas.
Masar ayaa ku boorisay in la xoojiyo wada-shaqeynta siyaasadeed iyo dadaallada diblomaasiyadeed ee lagu xallinayo xiisadaha ka taagan Soomaaliya iyo guud ahaan Geeska Afrika.
Dhankiisa, Wasiirka Arrimaha Dibadda ee Mareykanka Marco Rubio ayaa ku amaanay doorka Masar ee xasilinta gobolka, gaar ahaan taageerada ay siiso dowladda Soomaaliya iyo kaalinta ay ku leedahay fududeynta arrimaha bini’aadantinimo.
Labada wasiir ayaa isla gartay in la sii wado wada-shaqeynta u dhaxaysa Mareykanka iyo Masar si loo wajaho caqabadaha ka jira gobolka, gaar ahaan arrimaha Soomaaliya iyo amniga Geeska Afrika.
