Wararka24: Warar diblomaasiyadeed oo soo baxaya ayaa sheegaya in Imaaraadka Carabta uu wado dadaallo siyaasadeed oo lagu raadinayo in dalal cusub ay aqoonsadaan Somaliland, arrintan oo sii kordhin karta xiisadda diblomaasiyadeed ee Geeska Afrika.
Ilo-wareedyo u dhow dowladda Soomaaliya ayaa tilmaamay in dadaalladan lagu wajahayo dalal ay ka mid yihiin Eswatini, Argentina, Zambia iyo Dominican Republic, kuwaas oo la sheegay in lagu qancinayo inay qaadaan tallaabooyin la xiriira aqoonsiga Somaliland.
Arrintan ayaa kusoo aadeysa kadib markii Israel ay noqotay dalkii ugu horreeyay ee si rasmi ah u aqoonsada Somaliland bishii December 2025, tallaabo si weyn uga careysiisay dowladda Soomaaliya, isla markaana dhalisay dood caalami ah oo ku saabsan mustaqbalka gobolka.
Dowladda Federaalka Soomaaliya ayaa markale ku celisay mowqifkeeda ah in Somaliland ay tahay qayb ka mid ah dhulka Jamhuuriyadda Federaalka Soomaaliya, iyadoo sheegtay in aqoonsi kasta oo shisheeye uu dhaawacayo midnimada iyo wadajirka dalka.
Wararka ayaa sidoo kale sheegaya in xiriirka dhow ee u dhexeeya Imaaraadka iyo Somaliland, gaar ahaan maalgashiga dekedda Berbera, uu qayb ka yahay danaha istaraatiijiyadeed ee Abu Dhabi ee gobolka Badda Cas iyo Gacanka Cadmeed.
Si kastaba, ilaa hadda ma jiro war rasmi ah oo kasoo baxay dowladda Imaaraadka oo xaqiijinaya ama beeninaya eedeymahan, waxaana la filayaa in toddobaadyada soo socda ay soo baxaan faahfaahin dheeraad ah oo ku saabsan arrintan.
