Wararka24: Dowladda Isu-tagga Imaaraadka Carabta ayaa maanta shaacisay inay la kulantay weerarro culus oo isugu jira gantaallo iyo diyaarado aan duuliye lahayn, kuwaas oo sida ay sheegtay kaga yimid dhanka Iran.
Wasaaradda Difaaca Imaaraadka ayaa xaqiijisay in weerarka uu ahaa mid ballaaran, isla markaana ay ku jireen gantaallo riddada dheer oo lala beegsaday gudaha dalka. Dowladda ayaa sheegtay in nidaamyada difaaca hawada ay si degdeg ah uga jawaabeen, si loo yareeyo khasaaraha ka dhasha weerarka.
Wararka ayaa tilmaamaya in weerarka drones-ka uu sababay dab ka kacay xarun tamareed oo ku taalla magaalada Fujairah, taas oo kamid ah xarumaha muhiimka u ah dhoofinta shidaalka ee dalkaasi.
Maamulka Fujairah ayaa sheegay in kooxaha gurmadka degdegga ah ay si dhaqso leh uga howlgaleen goobta, iyadoo dadaallo lagu xakameynayo dabka ay weli socdaan.
Dhanka kale, xiisadda gobolka Khaliijka ayaa sii xoogeysatay kadib markii dowladda Maraykanka ay ku dhawaaqday qorshe cusub oo la xiriira ilaalinta maraakiibta mara marinka Hormuz, marinkan o ah mid muhiim u ah ganacsiga shidaalka.
Warbaahinta Iran ayaa sheegtay in ciidamada dalkaasi ay bartilmaameedsadeen markab dagaal oo Maraykan ah, balse taliska dhexe ee ciidamada Maraykanka ayaa si rasmi ah u beeniyay warkaas.
Weerarradan cusub ayaa sare u qaaday walaaca ku saabsan xasilloonida gobolka, iyadoo khubaradu ka digayaan in colaadda sii ballaarata ay saameyn ku yeelan karto suuqyada tamarta iyo amniga gobolka.
