Wararka24: Guddiga Madaxa-bannaan ee Doorashooyinka Qaranka iyo Soohdimaha ayaa si rasmi ah u shaaciyay liiska xubnaha ku guulaystay kuraasta Golaha Wakiillada ee doorashadii isku-sidkanayd ee 10-kii bishan ka dhacday Koonfur Galbeed.
Xildhibaannada cusub ee baarlamaanka Koonfur Galbeed ayaa tiradoodu dhan tahay 92 xubnood, kuwaas oo matali doona deegaannada maamulka muddo xileedka soo socda. Inta badan xubnahan ayaa kasoo baxay xisbiga Caddaaladda iyo Wadajir (JSP) oo uu hoggaamiyo Xassan Sheekh Maxamud.
Shaacinta liiskan ayaa timid kadib markii Maxkamadda Sare ee Jamhuuriyadda Federaalka Soomaaliya ay si kama dambeys ah u ansixisay natiijada doorashada, iyadoo maxkamaddu sheegtay inaan wax cabasho rasmi ah laga gudbin muddadii sharcigu oggolaa.
Sida ay hore u shaaciyeen guddiga doorashooyinka, doorashada waxaa ka qeyb-galay 32 urur siyaasadeed, halka tirada codbixiyeyaasha la diiwaangeliyay ay gaartay in ka badan 132,000 qof.
Kuraasta Golaha Wakiillada oo gaaraya 95 kursi ayaa xisbiga JSP ku guuleystay 51 kursi, halka ururka NPU uu helay 14 kursi, sida lagu sheegay natiijooyinka rasmiga ah ee doorashada.
Ansixinta natiijada iyo shaacinta xildhibaannada cusub ayaa furaysa waddada dhismaha hay’adaha cusub ee dowlad-goboleedka Koonfur Galbeed, oo ay ku jiraan doorashada guddoonka baarlamaanka iyo hoggaanka maamulka.
Doorashadan ayaa kusoo aadaysa xilli ay jiraan dooddo siyaasadeed iyo aragtiyo kala duwan oo ku saabsan hannaanka doorashooyinka dalka, iyadoo qaar kamid ah dhinacyada siyaasadda Soomaaliya ay weli ka muujiyeen walaac ku saabsan geeddi-socodka doorashada.
