Wararka24: Madaxweynaha HirShabelle Cali Cabdullaahi Xuseen Guudlaawe iyo guddoomiyaha Gobolka Banaadir Xasan Maxamed Xuseen Muungaab ayaa xalay kulan xasaasi ah ku yeeshay magaalada Muqdisho, iyagoo ka wada hadlay xaaladda siyaasadeed ee dalka.
Kulanka oo ka dhacay hoyga uu Muqdisho ka degan yahay madaxweynaha HirShabelle ayaa waxaa ka qeyb galay wasiirro iyo lataliyeyaal ka socday maamulkaas, halka dhinaca kale ay Muungaab wehlinayeen mas’uuliyiin ka tirsan maamulka gobolka Banaadir.
Labada dhinac ayaa iska xog wareystay xaaladaha ugu dambeeyay ee dalka, gaar ahaan khilaafaadka sii kordhaya ee la xiriira arrimaha doorashooyinka heer federaal iyo heer dowlad goboleed.
Intii uu socday kulanka, mas’uuliyiinta ayaa ka wada hadlay xoojinta wada shaqeynta iyo doorka ay ka qaadan karaan dowlad dhiska, iyagoo ku ballamay inay si wadajir ah uga shaqeeyaan horumarinta nidaamka dowladeed.
Madaxweyne Guudlaawe ayaa uga mahadceliyay Muungaab booqashada, isagoo ku booriyay in la sii xoojiyo xasilloonida caasimadda iyo wadajirka bulshada.
Dhankiisa, guddoomiye Muungaab ayaa sheegay inuu sii wadi doono dadaallada lagu horumarinayo iskaashiga labada dhinac, gaar ahaan dhinacyada amniga iyo la dagaallanka Al Shabaab.
Kulankan ayaa kusoo aaday xilli ay dalka ka jiraan xiisado siyaasadeed iyo diyaar garow doorasho oo ka socda maamullada HirShabelle, Galmudug iyo Koonfur Galbeed.
DAAWA
