Wararka24: Madaxweynihii hore ee Soomaaliya Maxamed Cabdullaahi Farmaajo ayaa cambaareeyay xarig loo geystay qaar ka mid ah darawallada mootooyinka bajaajta ee magaalada Muqdisho, kuwaas oo dhigay dibadbaxyo ay kaga cabanayeen sare u kaca qiimaha shidaalka.
War-saxaafadeed kasoo baxay xafiiska Farmaajo ayaa lagu sheegay in dhallinyarada bajaajleyda ay si nabad ah u muujinayeen cabashadooda ku aaddan culaysyada dhaqaale ee saameeyay noloshooda, waxaana dowladda loogu baaqay inay si degdeg ah u sii deyso dadka la xiray.
Farmaajo ayaa sheegay in dhallinyarada Soomaaliyeed ee ku shaqeeya duruufaha adag ay mudan yihiin garab istaag iyo in laga dulqaado culaysyada iyo canshuuraha ay ka cabanayaan, isagoo sidoo kale ugu baaqay dowladda inay ka fogaato tallaabo kasta oo lagu cabburinayo cabashooyinka shacabka.
Dibadbaxa bajaajleyda ayaa shalay ka dhacay waddada Maka Al-Mukarrama ee Muqdisho, halkaas oo ay dibadbaxayaashu xireen isgoyska KM4 oo ka mid ah meelaha ugu mashquulka badan caasimadda.
Darawallada bajaajta ayaa ku eedeeyay qaar ka mid ah ganacsatada shidaalka inay sare u qaadeen qiimaha, iyagoo dowladda ka dalbaday inay soo farageliso arrintan si loo yareeyo culayska saameeyay shaqadooda.
Qiimaha shidaalka ee Muqdisho ayaa maalmahan si weyn u kordhay, iyadoo wararka ganacsigu sheegayaan in halkii liitar ee baasiinka uu ka kacay qiyaastii $0.65 ilaa $1.50, arrin la xiriirta saameynta xiisadaha ka taagan Bariga Dhexe ee ku yeeshay suuqyada tamarta.
