Wararka24: Taliyaha Ciidamada Uganda Jeneraal Muhoozi Kainerugaba ayaa muujiyay taageerada uu u hayo Israa’iil xilli uu socdo dagaalka u dhexeeya Israa’iil iyo Iiraan, isaga oo sheegay in dalkiisu faragelin militari samayn karo haddii colaaddu sii ballaarato.
Qoraallo uu ku baahiyay baraha bulshada ayuu ku sheegay in isku day kasta oo lagu burburinayo Israa’iil uu keeni karo in Uganda ay si toos ah uga qayb qaadato dagaalka dhinaca Israa’iil.
Jeneraalka ayaa sidoo kale sheegay in Ciidanka Difaaca Dadka Uganda ay diyaar u yihiin inay tallaabo qaadaan haddii loo baahdo, isaga oo xusay inuu gargaar u bandhigay Mareykanka iyo Israa’iil.
Qaar ka mid ah hadalladiisa ayaa dhaliyay muran, kadib markii uu sheegay in ciidamada Uganda ay muddo kooban ku gaari karaan Tehran, inkastoo hadalkaas markii dambe la tirtiray.
Wuxuu mowqifkiisa ku saleeyay xiriirka taariikhiga ah ee u dhexeeya Uganda iyo Israa’iil, isaga oo xusay taageeradii hore ee ay Israa’iil siisay Uganda.
Hadalladan ayaa kusoo beegmaya xilli dagaalka Bariga Dhexe uu sii xoogeysanayo, iyadoo Mareykanka uu raadinayo waddo lagu soo afjaro colaadda.
Wararka ayaa sidoo kale tilmaamaya in Madaxweyne Donald Trump uu muujiyay inuusan dooneyn dagaal daba dheeraada, isla markaana uu rajeynayo in xal la gaaro toddobaadyada soo socda.
