Wararka24: 1-02-2026 Dowladda Uganda ayaa Lt Col Nathan Akankunda u magacowday taliyaha cusub ee cutubka ilaalada xarumaha Qaramada Midoobay ee ku yaalla xerada Xalane ee Muqdisho, isagoo beddelay Lt Col Peter Barigye oo xilka hayay.
Taliyaha cusub ayaa xilka kula wareegay munaasabad rasmi ah oo ka dhacday Muqdisho, halkaas oo lagu wareejiyay taliska United Nations Guard Unit (UNGU XI).
Ku-xigeenka Ergeyga Gaarka ah ee Xoghayaha Guud ee Qaramada Midoobay u qaabilsan Soomaaliya, Raisedon Zenenga, ayaa sheegay in cutubkii baxayay ay door muhiim ah ka qaateen sugidda amniga xarumaha iyo shaqaalaha Qaramada Midoobay. Wuxuu xusay in muddadii ay joogeen aan la diiwaangelin dhacdooyin amni oo waaweyn oo saameeyay xerada Xalane.
Taliyaha Ciidamada Hawlgalka Taageerada iyo Xasilinta Midowga Afrika ee Soomaaliya (AUSSOM), Lt Gen Sam Kavuma, ayaa isna sheegay in cutubkii hore ay si buuxda u guteen waajibaadkooda, isla markaana ay si sharaf leh u mataleen Uganda.
Lt Col Barigye ayaa dhankiisa uga mahadceliyay ciidamada uu hoggaaminayay dadaalkii ay sameeyeen intii ay joogeen Soomaaliya.
Lt Col Akankunda ayaa ballan qaaday inuu sii wadi doono sugidda amniga xarumaha Qaramada Midoobay, isla markaana uu xoojin doono wada-shaqeynta kala dhexeysa taliska AUSSOM iyo hay’adaha Qaramada Midoobay ee ka hawlgala dalka.
