Wararka24: Wasiirka Gaashaandhigga Soomaaliya, Axmed Macallin Fiqi, ayaa ciidamada Xoogga Dalka iyo kuwa deegaanka ee ku sugan xarumaha tababarka ee gobolka Shabeellada Dhexe faray inay galaan heegan buuxa, iyadoo dowladda ay dardargelinayso diyaarinta howlgallo cusub oo ka dhan ah Al-Shabaab.
Wasiirka ayaa ciidamada ku booriyay inay sare u qaadaan diyaar-garowgooda iyo howlgalada lagu ciribtirayo kooxda, isagoo sheegay in loo baahan yahay guluf mideysan oo lagu soo afjarayo deegaannada ay weli ku sugan yihiin Al-Shabaab.
Fiqi ayaa hadalkan jeediyay intii uu booqasho ku tagay degmada Raaga Ceelle ee gobolka Shabeellada Dhexe, halkaas oo uu kula kulmay saraakiisha iyo ciidamada Kumaandooska Gorgor ee ka qeyb qaadanaya qorshaha howlgalka cusub.
Sida ay sheegtay Wasaaradda Gaashaandhigga, dowladda ayaa wadda abaabulkii ugu dambeeyay ee lagu xoojinayo dagaalka ka dhanka ah Al-Shabaab, iyadoo la diyaarinayo ciidamo loo qorsheeyay inay howlgallo ka fuliyaan deegaanno ka tirsan Galmudug, HirShabeelle iyo Koonfur Galbeed.
Wasiirka ayaa ciidamada ku ammaanay doorkooda difaaca iyo howlgalada ay ka wadaan furimaha dagaalka, wuxuuna caddeeyay in dowladda ay sii kordhin doonto taageerada la siinayo ciidamada si loo wiiqo awoodda Al-Shabaab.
Sidoo kale, Axmed Macallin Fiqi ayaa shacabka Soomaaliyeed ugu baaqay inay ciidamada la wadaagaan xog kasta oo la xiriirta dhaq-dhaqaaqyada kooxda, isagoo sheegay in iskaashiga bulshada iyo hay’adaha amniga uu muhiim u yahay guusha howlgalada.
Wasiirka ayaa intaas ku daray in ciidamada ay guulo ka gaareen joojinta ilaha dhaqaale ee Al-Shabaab, isagoo xusay in howlgaladii ugu dambeeyay lagu qabtay xoolo ay kooxda ka qaadday shacabka, kuwaas oo uu sheegay inay u adeegsan jirtay maalgelinta howlaheeda.
