Dowladda Federaalka Soomaaliya ayaa soo saartay liiska warbaahinadii Al-Shabaab ay ku faafin jireen wararkooda, kuwaas oo la xiray. Mareegaha la xiray ayaa ka badan 10, waxaana ka mid ah: Somalimemo24.net, Radioalfurqaan.co, Dhaxalgalka.info, Faafreeb.com, iyo kuwo kale oo lagu faafin jiray gaboodfallada ay kooxdaasi ka geysaneyso dalka.
Wasaaradda Warfaafinta Soomaaliya ayaa sheegtay in la xiray 12 warbaahin oo ay Al-Shabaab si toos ah u isticmaali jireen, iyadoo dowladda horey u xirtay in ka badan 30 website oo ay kooxdaasi ku lahayd internet-ka.
“Dowladda Federaalka Soomaaliya ayaa xirtay ilaa iyo 12 warbaahin, nooca mareegaha oo ay Khawaarijtu lahaayeen, iyadoo horay ay dowladdu ugu guuleysatey xiritaanka in ka badan 30 bar-mareeg ama website oo Khawaarijtu ku lahaayeen barta internet-ka,” ayaa lagu yiri war maanta ka soo baxay wasaaradda.
Xog muhiim ah oo gacanta lagu dhigay oo ku saabsan warbaahinadii Al-Shabaab
Sidoo kale, dowladda ayaa gacanta ku dhigtay xogta iyo raadadka shaqsiyaad badan oo ku lug lahaa hawlaha barahaan, kuwaas oo la sheegay inay taageero dhaqaale iyo farsamo siiyeen Al-Shabaab.
“Xogta la helay waxay sahli doontaa in tallaabo laga qaado dembiilayaasha Khawaarijta ugu adeegayay hawlahan,” ayaa lagu yiri qoraalka dowladda.
Liiska Website-yada la xiray:
- warkiislamka.com
- somalimemo24.com
- somalimemo24.net
- dhaxalgal.net
- dhaxalgal.com
- radioalfurqaan.co
- dhaxalgalka.info
- faafreeb.com
- faafreeb.net
- faafreeb24.com
- faafreeb24.net
- amirnur.com
Hawlgalka burburinta warbaahinadii Al-Shabaab oo sii socondoonta DF
Wasaaradda Warfaafinta ayaa sheegtay in hawlgalka burburinta warbaahinta Al-Shabaab uu weli socdo, iyadoo la burburiyay kumanaan baro oo ay kooxdaasi ka sameysteen baraha bulshada.
Waxaa la filayaa in hay’adaha dowladda ay mar dhow gacanta ku soo dhigi doonaan website-yada kale ee lagu faafiyo wararka marin-habaabinta ah ee kooxdaasi.
📌 Wararka24 – Xog rasmi ah & Faahfaahin degdeg ah
