Muqdisho – Wararka24: Koox burcad-badeed Soomaali ah oo shalay qabsatay markabka Hellas Aphrodite ayaa lagu waramayaa inay isaga degeen markabka, kadib markii ay ku guuldarreysteen inay furaan qolalka amniga ee ay isku xireen 24 ka mid ah shaqaalaha markabka.
Warar maxalli ah ayaa sheegaya in mid ka mid ah dableyda uu ku dhaawacmay rasaas ay isku dayayeen inay ku furaan albaabada qolalka, taasoo dib ugu soo laabatay dhankooda. Shaqaalihii markabka oo isku difaacay qolalkaas ayaa si nabad ah lagu xaqiijiyay in ay badqabaan.
Howlgalka Midowga Yurub ee ka hortagga burcad-badeedda, ATALANTA, ayaa xaqiijiyay in dableyda ay iskood uga dageen markabka, isla markaana aan waxyeello soo gaarin shaqaalaha.
Balse howlgalka ayaa ka digay in kooxdan ay weli wataan doonyo awood u leh inay gaaraan biyaha ka baxsan kuwa caalamiga ah, taasoo keeni karta inay mar kale fuliyaan weerarro cusub.
Markabka Hellas Aphrodite oo ku safrayay calanka jasiiradda Malta, ayaa siday shidaal uu kasoo qaaday Hindiya, isagoo kusii jeeday Koonfur Afrika, xilli uu marayay meel 1,000 km u jirta xeebaha Soomaaliya — goob hore loogu arkay weerarro burcad-badeed ah.
Dhacdadan ayaa timid xilli ay dib u soo cusboonaadeen weerarrada burcad-badeedda Soomaaliyeed ee muddo sanado ah hoos u dhacay. Isniintii, dabley hubeysan ayaa weeraray markab ganacsi oo u dhow xeebta Muqdisho, halka warar kale ay sheegayaan in koox kale ay la wareegeen doon kalluumeysi oo ay leedahay Iiraan, taasoo loo adeegsaday “hooyo-markab” ay ka fulinayaan weerarrada badda.
Weerarkii ugu dambeyay ee la midka ahaa wuxuu dhacay Diseembar 2023, markii markabka Ruen ee sita calanka Malta la afduubtay, balse ciidanka badda ee Hindiya ay dib u xoreeyeen shaqaalihii isla markaana ay xireen kooxdii weerarka geysatay.
Khubarada amniga badda ayaa sheegay in inkastoo firfircoonidii burcad-badeedda Soomaalida ay hoos u dhacday sanadihii dambe, haddana dhacdooyinkan cusub ay muujinayaan khatar sii kordheysa oo ku wajahan maraakiibta ganacsiga ee maraya Gacanka Cadmeed iyo Badweynta Hindiya.
