MUQDISHO — In ka badan 15 qof oo Soomaaliyeed oo laga soo tarxiilay dalka Jarmalka ayaa maanta laga soo dejiyey garoonka diyaaradaha Aadan Cadde ee magaalada Muqdisho. Dadkan ayaa la sheegay in muddo dheer ku sugnaayeen Jarmalka iyagoo ku joogay halka codsiyo magangilyo, balse la diiday codsiyashoodi.
Soomaalidan ayaa waxay ku noolaayeen gobollada Saxony iyo Bavaria ee dalka Jarmalka, waxaana lagu helay dhammaan dambiyo lagu soo oogay oo ay ka mid yihiin isku day dil, kufsi, dhac, dagaal ay la galeen booliska iyo isku day khiyaamo.
Waxaa la saadaalinayaa in dhalinyaro Soomaaliyeed oo haatan ku xiran xabsiyada dalka Jarmalka lasoo celin doono, iyagoo lagu tuhunsan yahay inay galeen dambiyo culus. Wasiiru Dowlaha Arrimaha Dibadda Soomaaliya, Cali Cumar Cali Balcad, ayaa hore u xaqiijiyay in dadka la filayo in dib loogu soo celiyo dalka, muwaadiniin Soomaaliyeed oo lagu helay dambiyo kala duwan oo ay ka galeen gudaha Jarmalka.
Arrintan ayaa kusoo beegmeysa iyadoo xiriirka Jarmalka iyo Soomaaliya uu marayo xilli ay socdaan dadaallo diblomaasiyadeed oo lagu horumarinayo iskaashiga dhinacyada ammaanka iyo socdaalka.
Dowladda Soomaaliya weli si rasmi ah ugama hadlin sababaha rasmiga ah ee keenay tarxiilka, inkastoo ilo-wareedyo diblomaasiyadeed ay sheegayaan in tallaabadaasi ay qeyb ka tahay heshiisyo dib loogu celinayo dadka lagu helo sharci-darro.
