LAASCAANOOD – Shirka dhismaha maamul goboleedka Khatumo ayaa maanta galay maalintiisii labaad. Shirka ayaa ka socda magaalada Laascaanood ee xarunta gobolka Sool.
Guddiga qaban qaabada shirka ayaa shaaciyay in maanta odayaasha dhaqanku ay soo xuli doonaan ergooyinka ku matalaya arrimaha xasaasiga ah ee maamulka. Ergooyinkaas ayaa maalinimada berri ah dood ka yeelan doona arrimaha maamul dhiska.
Shirka ayaa looga doodayaa nidaamka guud ee gobalka, dib uhabeynta macaga maamulka Khatumo, calanka, dastuurka iyo awood qaybsiga beelaha. Odayaasha dhaqanka ee beelaha kala duwan ayaa ergooyin soo gudbinaya.
Guud ahaanba shirka waxaa qaadacay Garaad Jaamac Garaad Cali iyo siyaasiyiinta mucaaradka. Shirka ayaa lagu marti qaaday wafti ka socda Sanaag iyo Haylaan.
Isimada beelaha Sanaag iyo Haylaan ayaa sheegay inaysan qayb ka ahayn maamulka Khatumo. Waxay ku tilmaameen tallaabadaas inay tahay xad gudub lagu sameeyey qaar kamid ah xubnaha beelaha.
Shirka ayaa weli socda iyadoo la filayo in maalinimada berri ah la gaaro go’aamo muhiim ah oo ku saabsan dhismaha maamulka. Guddiga qaban qaabada waxay diyaar u yahiin in ay sii wadaan howlgallada shirka.
