Wararka24: Hay’adda Cilmi-baarista Nabadda ee Stockholm (SIPRI) ayaa ka digtay in howlgalka Taageerada iyo Xasilinta Midowga Afrika ee Soomaaliya (AUSSOM) uu wajahayo caqabado dhaqaale iyo siyaasadeed oo sii kordhaya, kuwaas oo khatar gelin kara awoodda howlgalka ee sugidda amniga Soomaaliya.
Warbixin cusub oo ay hay’addu soo saartay ayaa muujisay in howlgalada nabad ilaalinta caalamiga ah ay la kulmayaan hoos u dhac ku yimid tirada ciidamada iyo shaqaalaha, iyadoo dhammaadka sanadkii 2025 la diiwaangeliyay heerkii ugu hooseeyay muddo ka badan 25 sano. SIPRI ayaa sheegtay in xaaladdan ay ka dhalatay dhaqaale yari, khilaafaad siyaasadeed iyo loollan sii xoogeysanaya oo u dhexeeya quwadaha waaweyn ee caalamka.
Warbixinta ayaa xustay in AUSSOM, oo sanadkii 2025 beddelay howlgalka ATMIS, uu weli la daalaa dhacayo maalgelin aan joogto ahayn. Inkastoo Golaha Ammaanka ee Qaramada Midoobay uu kordhiyay muddada howlgalka ilaa dhammaadka 2026, haddana waxaa la muujiyay walaac ku saabsan sida loo heli doono dhaqaalaha lagama maarmaanka u ah sii socoshada howlaha amniga.
SIPRI waxay sheegtay in Soomaaliya iyo dalalka ciidamada ka joogaan howlgalka ay dhowr jeer yeesheen kulamo looga hadlay maalgelinta AUSSOM, balse weli ay jiraan caqabado la xiriira hirgelinta nidaamyada cusub ee taageerada dhaqaale. Hay’addu waxay ka digtay in haddii aan xal loo helin arrintan, ay saameyn ku yeelan karto howlgalada lagu taageerayo xasilinta Soomaaliya.
Dhanka kale, warbixintu waxay xustay in Midowga Yurub uu bishii Abriil 2026 xaqiijiyay taageero dhan 75 milyan oo Yuuro oo loogu talagalay AUSSOM, taas oo muujinaysa in weli ay jirto taageero caalami ah oo loo hayo howlgalka. Si kastaba, khubaradu waxay sheegeen in loo baahan yahay taageero dhaqaale iyo mid siyaasadeed oo joogto ah si loo xaqiijiyo guusha howlgalka.
SIPRI ayaa ugu dambeyn ka digtay in haddii ay sii socdaan dhibaatooyinka maalgelinta iyo khilaafaadka siyaasadeed, howlgalada nabad ilaalinta caalamiga ah ay wajihi karaan hoos u dhac weyn, taas oo saameyn karta dadaallada lagu xallinayo colaadaha iyo xasilinta dalalka ay Soomaaliya ku jirto.
