Wararka24: Maamulka Puntland ayaa sheegay in ciidamada amniga ay gacanta ku dhigeen dagaalame ajaanib ah oo ka tirsanaa kooxda Daacish, kaas oo lagu qabtay deegaanka Af-cas ee buuraha Calmiskaad, halkaas oo ay weli ka socdaan howlgallo amni.
Afhayeenka Hawlgalka Calmiskaad, Jeneraal Maxamuud Jaamac Faadhigo, ayaa sheegay in ninka la qabtay uu u dhashay dalka Yemen isla markaana uu muddo ka tirsanaa dagaalamayaasha Daacish ee ku sugan buuraha Calmiskaad. Sida uu sheegay, dagaalamahan ayaa la qabtay xilli uu ku jiray dhaqdhaqaaq la xiriira howlaha kooxda.
Gen. Faadhigo ayaa xusay in ninka la qabtay uu qirtay inuu kasoo baxay saldhig ay kooxda Daacish ku leedahay deegaanka Shakaala. Wuxuu sheegay in dagaalamahan iyo xubno kale oo la socday loo diray inay soo helaan dameero loo adeegsanayo sahayda iyo baahiyaha kooxda.
Afhayeenka ayaa sidoo kale sheegay in kooxda Daacish ay la tacaaleyso xaalado adag oo dhinaca sahayda iyo cunnada ah, taas oo saameyn ku yeelatay awooddooda dhaqdhaqaaqa iyo howlgalada. Sida uu sheegay, xirnaanshaha marinadii sahaydu mari jirtay ayaa sii kordhiyay cadaadiska saaran kooxda.
Ciidamada Puntland iyo kuwa deegaanka ayaa weli wada howlgallo ka dhan ah Daacish, kuwaas oo ka socda deegaanno kala duwan oo ku yaalla buuraha Calmiskaad. Mas’uuliyiinta ammaanka ayaa sheegay in goobihii ay ku sugnaayeen xubnaha kooxda la hareereeyay, isla markaana si dhow loola socdo dhaqdhaqaaqyadooda.
Howlgalladan ayaa qayb ka ah dadaallada ay Puntland ku doonayso inay ku wiiqdo awoodda kooxaha hubeysan ee ka howlgala deegaannada buuraleyda ah. Saraakiisha ammaanka ayaa muujiyay rajo ah in howlgalada socda ay horseedi doonaan in la xakameeyo dhaqdhaqaaqyada kooxda Daacish ee gobolka.
Maamulka Puntland ayaa horey u sheegay in uu sii xoojinayo howlgallada amni ee ka socda Calmiskaad, iyadoo la doonayo in laga hortago khataraha amni ee ay kooxahaasi ku hayaan shacabka iyo deegaannada gobolka.
