Wararka24: Duqayn xooggan ayaa maanta ka dhacday deegaanka Ceelka Miiraale ee maamulka Puntland, iyadoo lala beegsaday xubno ka tirsan kooxda Daacishi.
Wararka laga helayo furimaha dagaalka ayaa sheegaya in duqayntan loo maleynayo inay fuliyeen ciidamada Maraykanka, iyadoo kusoo aadeysa xilli dagaallo culus ay tan iyo shalay halkaasi ku dhex-marayeen ciidamada Puntland iyo dagaalyahannada Daacish.
Ciidamada Puntland ayaa la sheegay inay wadaan howlgallo ka dhan ah kooxda, si ay uga saaraan fariisimaha ay weli kaga harsan yihiin aagga Ceelka Miiraale. Ilo amni ayaa tilmaamay in duqaynta ay qeyb ka tahay taageerada militari ee ay Maraykanku siiyaan howlgalada ka dhanka ah kooxda.
Wararka ayaa sheegaya in ciidamada Puntland ay la kulmeen iska caabin adag oo uga timid kooxda Daacish, taas oo dib u dhigtay dadaalladii lagu doonayay in si buuxda looga saaro goobaha ay ku dhuumaaleysanayaan.
Ilaa hadda ma jiro war rasmi ah oo kasoo baxay maamulka Puntland ama dowladda Maraykanka oo xaqiijinaya duqaynta iyo khasaaraha ka dhashay. Si kastaba, muuqaallo laga soo duubay jiidda hore ayaa muujinaya qaraxyo xooggan oo ka dhacay goobaha la tuhunsan yahay inay ku sugnaayeen xubnaha kooxda.
Howlgallada ka socda buuraha iyo togagga u dhow magaalada Bosaso ayaa qayb ka ah dadaallada lagu xakameynayo dhaq-dhaqaaqyada Daacish, kadib markii kooxda ay dib ugu soo laabatay deegaanno hore looga saaray.
