MUQDISHO — Ra’iisul Wasaare Xamse Cabdi Barre ayaa maanta guddoomiyay maalintii labaad ee Wadatashiga Qaran ee Muqdisho.
Xamse wuxuu sharaxay siyaasadda xukuumadiisa. Wuxuu ka hadlay midnimada, amniga, doorashooyinka iyo dhammaystirka dastuurka.
Ra’iisul wasaaruhu wuxuu sheegay in dalku uu marayo waqti muhiim ah. “Waxaan u baahanahay midnimo si aan uga gudubno caqabadaha,” ayuu yiri.
Xamse wuxuu sheegay in wadatashiga uu furan yahay qof walba. “Waxaa jooga dhammaan dadkii doonayay inay hoggaanka qabtaan,” ayuu intaa ku daray.
Wuxuu ummadda ugu baaqay inay u midoobaan dagaalka Khawaarijta. Sidoo kale wuxuu xusay muhiimadda doorashooyinka iyo dowlad dhiska.
“Caqabadaha na hortaagan ma fududa. Cadow ayaa halis ku ah diinteenna iyo dowladnimadeenna,” ayuu hadalkiisa sii watay.
Ra’iisul wasaaruhu wuxuu sheegay in xukuumadiisu ay waddo dhisidda dowlad dimuqraadi ah. “Gacanna cadowgeenna ayaan kula dagaalaynaa, gacanna Qaranka ayaan ku dhisaynaa,” ayuu yiri.
