GAROWE — Dowladda Puntland ayaa sheegtay in kooxda Daacish ay malaayiin dollar ku heshay shirkadaha telefoonka dalka.
Xogtan ayaa la helay kadib markii ciidamada Puntland ay gaareen Cal-miskaad. Halkaas ayay Daacish saldhig ku lahayd muddo dheer.
Madaxweyne Saciid Deni ayaa sheegay in la helay telefoonno ay kooxdu isticmaali jirtay. Telefoonnadaasi waxaa lagu arkay lacago malaayiin dollar ah oo la kala wareejiyay.
“Malaayiin lacag ah ayaa telefoonno dhexmaray. Lacagahaas dibadda ayaa loo diray Afrika iyo Asia,” ayuu yiri Deni.
Madaxweynaha ayaa sheegay in shirkadaha telefoonka aysan la shaqeyn dawladda. Wuxuu ku eedeeyay inay diidaan inay xogta siiyaan dowlada marki amni loo baahdo.
“Markaan u baahano xog amni awgeed, waxay dhahaan waa sir. Haddii qof argagixiso ahi uu xogta hayo, aniga oo dawladi ahna aanan helin, taasi waa khatar,” ayuu yiri.
Deni wuxuu sheegay in dawladdu aysan doonayn inay xoog ku qaadato shirkadaha. Wuxuu dalbaday inay ka shaqeeyaan amniga bulshada.
Daacish ayaa muddo dheer isticmaali jirtay simkaarta shirkadaha si ay lacag ugu soo ururiyaan. Lacagahaasi waxay u isticmaali jireen hawlahooda argagixisanimo.
