GAROWE – Wasiirka Warfaafinta Puntland ayaa si kulul uga falceliyey diyaaraddii shalay keentay Cabdirashiid Janan magaalada Beled Xaawo, ka hor inta aan laga tallaabin xadka Kenya. Wasiirku wuxuu sheegay in arrintan ay muujinayso qorshe siyaasadeed oo aan la qarin karin, isagoo yiri: “Wixii uu Xasan Sheekh ka cararo annagaa is kaleh, reer Baladxaawo nagu sima, waan soo soconnaa.”
Diyaaradda oo la rumeysan yahay inay la xiriirtay safar siyaasadeed ayaa hadda taalla Beled Xaawo, halkaasoo si buuxda gacanta ugu haya maamulka Jubbaland. Ilo-wareedyo maxalli ah ayaa sheegaya in ciidamada Jubbaland ay si buuxda u sugayaan ammaanka garoonka iyo magaalada.
Hadalkan kasoo yeeray Puntland ayaa kusoo beegmaya iyadoo xaaladda siyaasadeed ee dalka ay cakiran tahay, waxaana muuqata in maamulka Puntland uu si toos ah uga falcelinayo tallaabooyinka Villa Somalia iyo xiriirka ay la leeyihiin shaqsiyaadka mucaaradka ah.
