Wararka24: Siyaasiyiinta mucaaradka Soomaaliya ayaa maanta shir jaraa’id ku qabtay magaalada Muqdisho, iyaga oo si adag uga hadlay xaaladda siyaasadeed ee dalka iyo muranka ka taagan muddo xileedka hay’adaha dowladda Federaalka Soomaaliya.
Shirka oo ay ka qeybgaleen xubno horey xilal sare uga soo qabtay dowladda ayaa lagu sheegay in Madaxweyne Xasan Sheekh Maxamuud aanu sharci ahaan sii ahaan karin madaxweynaha dalka wixii ka dambeeyay 15-ka May, xilli ay mucaaradku ku doodayaan in uu dhammaaday muddo xileedkii dastuuriga ahaa ee afarta sano.
Ra’iisul wasaarihii hore ee Soomaaliya Xasan Cali Khayre ayaa sheegay in dalka lagu maamulo sharci iyo nidaam, islamarkaana aan la aqbali karin in hay’adaha dowladda ay sii shaqeeyaan iyadoo aan la helin heshiis siyaasadeed oo mideysan. Wuxuu ku tilmaamay marxaladda hadda jirta mid halis ku ah xasilloonida iyo dowladnimada dalka. wuxuu kudaray in Madxweyne Xasan Sheekh uu lamid yahay Sheekh Shariif, ayna yihiin Madaxweynayaal hore oo dalka soo maray, sida uu ku dooday.
Khayre ayaa sidoo kale sheegay in xaaladda siyaasadeed ee Soomaaliya aysan sidan oo kale u adkaan xilliyadii hore ee kala guurka, isaga oo shacabka ugu baaqay inay muujiyaan feejignaan iyo midnimo si looga hortago khilaaf sii xoogeysan kara.
Dhankooda, xubnaha mucaaradka ayaa mar kale ku celiyay baaqooda ku aadan in la qabto wada-hadal qaran oo ay kasoo qeybgalaan dhammaan saamileyda siyaasadda dalka, si loo gaaro heshiis lagu wada qanacsan yahay oo ku saabsan doorashooyinka iyo sharciyadda hay’adaha dowladda.
Dowladda Federaalka Soomaaliya ayaa dhankeeda ku adkeysaneysa in muddo xileedka hay’adaha dowladda uu yahay shan sano, kadib ansixinta dastuurka cusub ee baarlamaanka Soomaaliya. Dowladda ayaa sidoo kale sheegtay in dalka loo jihaynayo doorasho qof iyo cod ah oo shacabka Soomaaliyeed ay si toos ah uga qeyb qaadan doonaan.
DAAWO
