Wararka24: Dowladda Koonfur Afrika ayaa shaacisay inay baaritaan ku sameyneyso urur Soomaaliyeed oo ka howlgala dalkaasi, kadib markii lagu eedeeyay inuu si sharci darro ah u adeegsaday astaanta qaranka Koonfur Afrika.
Wasaaradda Ciyaaraha, Fanka iyo Dhaqanka ee Koonfur Afrika ayaa sheegtay in astaanta qaranka ay tahay calaamad qaran oo si gaar ah sharci loogu ilaaliyo, islamarkaana aan loo isticmaali karin si aan fasax rasmi ah loo haysan.
Mas’uuliyiinta dowladda ayaa tilmaamay in wasiirka wasaaraddu uu amar bixiyay si loo baaro haddii ururkaasi uu jebiyay xeerarka iyo sharciyada quseeya isticmaalka astaamaha qaranka. Dowladda ayaa sheegtay in haddii lagu helo khalad ururka lagu amri doono inuu joojiyo isticmaalka astaanta, isla markaana laga qaadi karo tallaabo sharci ah.
Sidoo kale, dowladda Koonfur Afrika ayaa sheegtay in kooxda baaritaanka wada loo qabtay muddo 10 maalmood oo shaqo ah si ay kusoo gudbiyaan warbixinta iyo natiijada baaritaanka lagu sameynayo arrintan.
Wasiirka wasaaradda ayaa sheegay in dowladda aysan aqbali doonin in astaamaha qaranka si aan sharci ahayn loo adeegsado, isaga oo carrabka ku adkeeyay in astaanta qaranka uu leeyahay shacabka Koonfur Afrika, loona baahan yahay in si sharaf iyo xushmad leh loola dhaqmo.
“Daacadnimada iyo karaamada astaamaha qaranka waa arrin aan laga tanaasuli karin,” ayuu yiri wasiirka, isaga oo xusay in dowladdu ay tallaabo ka qaadi doonto cid kasta oo ku xadgudubta shuruucda isticmaalka astaamaha qaranka.
Wasaaradda ayaa sidoo kale sheegtay inay warar dheeraad ah kasoo saari doonto arrintan marka xafiiska Bureau of Heraldry uu soo gabagabeeyo qiimeynta iyo baaritaanka socda.
