Wararka24: Xubnaha siyaasiyiinta mucaaradka ayaa si adag uga falceliyay tallaabadii uu maanta qaaday safiirka cusub ee Jamhuuriyadda Jabuuti usoo magacowday Soomaaliya, Col. Cusmaan Dubbad Sugulle, kadib markii uu waraaqaha aqoonsiga danjirenimo u gudbiyay Madaxweynaha Soomaaliya Xasan Sheekh Maxamuud.
Munaasabadda lagu guddoonsiinayay waraaqaha aqoonsiga ayaa ka dhacday xarunta Villa Soomaaliya, halkaas oo Madaxweyne Xasan Sheekh uu kusoo dhaweeyay safiirka cusub, isaga oo ugu hambalyeeyay xilka loo igmaday iyo xoojinta xiriirka labada dal.
Madaxweynaha ayaa kulankaasi ku adkeeyay muhiimadda iskaashiga Soomaaliya iyo Jabuuti ee dhinacyada siyaasadda, amniga iyo dhaqaalaha, isagoo safiirka cusub u rajeeyay shaqo miro-dhal ah.
Arrintan ayaa si weyn uga careysiisay mucaaradka, gaar ahaan Madasha Samatabixinta Soomaaliyeed. Xoghayaha madashaasi, Maxamed Aadan Jimcaale (Koofi), ayaa sheegay in safiirka Jabuuti looga baahnaa inuu sugo xaaladda siyaasadeed ee dalka, maadaama mucaaradku ay ku doodayaan inuu dhammaaday muddo xileedka Madaxweynaha.
“Safiirka walaalaha Jabuuti waxay ahayd inuu sugo Madaxweynaha sharciga ah ee soo socda. Xasan Sheekh waa madaxweynihii hore ee dalka mana lahan awood sharci ah oo uu go’aanno masiiri ah ku gaaro wixii ka dambeeya 15-ka May,” ayuu yiri Maxamed Aadan Koofi.
Sidoo kale, wuxuu ugu baaqay safiirrada iyo wakiillada beesha caalamka ee ku sugan Muqdisho inay ixtiraamaan dastuurka iyo sharciyada dalka, gaar ahaan muranka siyaasadeed ee hadda taagan.
Dhanka kale, Villa Soomaaliya ayaa weli ku adkeysaneysa in muddo xileedka dowladda federaalka uu soconayo ilaa 15-ka May 2027, iyadoo ku saleyneysa dastuurka cusub ee la dhaqan geliyay.
Kulamadan diblomaasiyadeed ee Madaxweynaha uu la yeelanayo safiirrada dalalka saaxiibbada la ah Soomaaliya ayaa loo arkaa kuwo wiiqaya doodda mucaaradka, maadaama ay muujinayaan in waddamo dhowr ah ay sii wadaan xiriirka rasmiga ah ee ay la leeyihiin dowladda federaalka.
