Wararka24: Madaxweynaha Dowladda Federaalka Soomaaliya Xassan Sheekh Maxamud iyo wafdi uu hoggaaminayo ayaa gaaray magaalada Djibouti City, halkaas oo uu kaga qeyb galayo munaasabadda caleemo-saarka Madaxweynaha dib loo doortay ee dalka Djibouti.
Madaxweynaha iyo wafdigiisa ayaa garoonka diyaaradaha waxaa ku soo dhoweeyay Ra’iisul Wasaaraha Jabuuti Abdoulkader Kamil Mohamed iyo mas’uuliyiin kale, kuwaas oo muujiyay xiriirka dhow ee iskaashi ee ka dhexeeya Soomaaliya iyo Jabuuti.
Hassan Sheikh Mohamud ayaa ka mid ah madaxda gobolka Geeska Afrika ee lagu casuumay munaasabadda caleemo-saarka Madaxweynaha Jabuuti Ismail Omar Guelleh, oo markale dib loogu doortay xilka madaxtinimada.
Inta uu joogo Jabuuti, Madaxweynaha Soomaaliya ayaa la filayaa inuu kulamo gaar ah la yeesho madaxda sare ee dalkaasi iyo mas’uuliyiin kale oo ka qeyb galaya munaasabadda, si looga wada hadlo arrimaha iskaashiga labada dal iyo xaaladaha gobolka.
Ismail Omar Guelleh ayaa dhawaan ku guuleystay doorashadii madaxtinimada ee Jabuuti, isagoo helay boqolkiiba 97.8 codadka, taas oo u sahashay inuu sii hayo hoggaanka dalka markii lixaad.
Doorashadaasi ayaa waxaa qaadacay inta badan mucaaradka Jabuuti, iyadoo musharraxii la tartamayay uu helay codad aad u kooban, arrintaas oo dhalisay dood siyaasadeed gudaha dalkaasi.
Geelle oo 78 jir ah ayaa talada Jabuuti hayay muddo ku 27 sano ah, kadib markii wax ka beddel lagu sameeyay dastuurka dalka si meesha looga saaro xadka da’da musharraxiinta madaxtinimada.
