Wararka24: Safiirkii hore ee Turkiga u qaabilsanaa Soomaaliya ayaa soo bandhigay 10 qodob oo uu sheegay inay gacan ka geysan karaan xal u helidda xiisadda siyaasadeed ee ka taagan Soomaaliya, kadib muranka ka dhashay muddo xileedka dowladda federaalka iyo hannaanka doorashooyinka dalka.
Diblomaasigan hore ayaa sheegay in Soomaaliya ay gashay marxalad siyaasadeed oo xasaasi ah, kadib markii ay mucaaradka diideen fasiraadda dowladda ee ku aaddan muddo xileedka cusub ee hay’adaha dowladda.
Qodobada uu soo jeediyay waxaa kamid ah in Dowladda Federaalka iyo mucaaradku ay ku heshiiyaan magacaabista Ra’iisul Wasaare madax-bannaan oo aan isu soo sharxi doonin xilka madaxweynaha, si loo helo kalsooni siyaasadeed iyo maamul dhexdhexaad ah.
Wuxuu sidoo kale soo jeediyay in la dhiso xukuumad loo dhan yahay oo maamusha arrimaha dowladda inta lagu jiro marxaladda kala guurka, islamarkaana diyaarinaysa doorashooyin lagu wada qanacsan yahay.
Qodobada kale waxaa kamid ahaa dhismaha guddi doorasho oo madax-bannaan, diyaarinta diiwaangelinta codbixiyeyaasha, dejinta jadwal doorasho oo daah-furan iyo in Soomaaliya si tartiib ah ugu guurto nidaamka doorashada qof iyo cod.
Safiirkii hore ee Turkiga ayaa sidoo kale ku baaqay in Baarlamaanka cusub uu doorto madaxweynaha marka la soo dhammeeyo doorashooyinka, halka hay’adaha cusubna laga doonayo inay sii wadaan dhammaystirka dastuurka dalka iyadoo loo marayo wada-tashi qaran.
Wuxuu uga digay dhammaan dhinacyada inay qaataan go’aanno hal dhinac ah ama hadallo kicin kara xiisadda siyaasadeed iyo kala qeybsanaanta bulshada, isagoo ku booriyay saaxiibbada caalamka inay dhiirrigeliyaan wadahadal iyo tanaasul siyaasadeed.
Sidoo kale, diblomaasigan ayaa xusay in Soomaaliya ay horumar muuqda sameysay labaatankii sano ee lasoo dhaafay, inkastoo ay jireen caqabado badan, wuxuuna carrabka ku adkeeyay in horumarkaasi lagu ilaalin karo oo keliya wada-hadal, is-qancin iyo siyaasad loo dhan yahay.
Qoraalkan ayaa kusoo aadaya xilli ay fashilmeen wada-hadalladii dowladda federaalka iyo mucaaradka ee ka dhacay Muqdisho, kuwaas oo lagu doonayay in xal looga gaaro khilaafka siyaasadeed ee sii xoogeysanaya.
