Wararka24: Wasiirka Gaashaandhigga Soomaaliya, Axmed Macallin Fiqi ayaa eedeymo culus u jeediyay Madaxweynaha Puntland, Saciid Cabdullaahi Deni, isaga oo ku eedeyay inuu ka horyimid midnimada iyo dowladnimada Soomaaliya.
Wasiir Fiqi ayaa sheegay in Deni uu xiriir la yeeshay dowlado shisheeye oo uu ku tilmaamay kuwo khatar ku ah jiritaanka iyo wadajirka Soomaaliya, isaga oo sidoo kale ku eedeeyay inuu taageeray kala go’a dalka.
“Deni wuxuu Soomaaliya kala saftay shisheeyihii la is qabtay, wuxuu taageeray kala go’a dalka,” ayuu yiri wasiirka gaashaandhigga oo qoraal adag soo saaray.
Sidoo kale, wasiirka ayaa sheegay in hoggaamiyaha Puntland uu muddo afar sano ah jaray xiriirkii iyo wada shaqeyntii kala dhexeysay Dowladda Federaalka Soomaaliya, taas oo uu ku tilmaamay tallaabo dhaawaceysa dowladnimada dalka.
Wasiir Fiqi ayaa sidoo kale ku dhaliilay Deni inuu xiriir dhow la yeeshay dowlado uu sheegay inay halis ku yihiin madax-bannaanida Soomaaliya, isaga oo ku eedeeyay inuu iska dhigayo siyaasi daneynaya badbaadinta dalka.
Qoraalka wasiirka ayaa kusoo aadaya xilli ay sii kordhayaan khilaafaadka siyaasadeed ee u dhexeeya Dowladda Federaalka Soomaaliya iyo maamulka Puntland, gaar ahaan arrimaha dastuurka, doorashooyinka iyo maamulka dalka.
Ma jiro illaa hadda wax jawaab rasmi ah oo kasoo baxay Puntland ama Madaxweyne Saciid Deni oo ku aaddan eedeymaha culus ee uu jeediyay Wasiirka Gaashaandhigga Soomaaliya.
Xiisadda siyaasadeed ee u dhexeysa Muqdisho iyo Garoowe ayaa sii xoogeysatay bilihii lasoo dhaafay, iyadoo labada dhinac ay isku hayaan arrimo dhowr ah oo la xiriira nidaamka federaalka iyo maamulka doorashooyinka dalka.
