Wararka24: Dowladda Mareykanka ayaa sheegtay in aysan faro-gelin ku sameyn doonin hannaanka doorashooyinka Soomaaliya, islamarkaana aysan hoggaamin doonin dhexdhexaadinta khilaafka siyaasadeed ee u dhexeeya Dowladda Federaalka iyo mucaaradka.
Sii hayaha xilka safiirka Mareykanka ee Soomaaliya Justin Davis ayaa sheegay in Washington ay wada hadallo la yeelatay Dowladda Federaalka Soomaaliya iyo Golaha Mustaqbalka Soomaaliyeed si loo fahmo xaaladda siyaasadeed ee taagan. Wuxuu caddeeyay in Mareykanku uusan martigelinayn ama maamulayn wada-hadallada dhinacyada.
Justin Davis ayaa sheegay in mustaqbalka Soomaaliya uu ku jiro gacanta shacabka Soomaaliyeed iyo hoggaamiyeyaashooda. Wuxuu xusay in dowladda Mareykanka aysan Soomaalida u sheegi doonin sida ay u dooranayaan hoggaankooda ama jadwalka doorashooyinka.
Hadalkan ayaa kusoo aadaya xilli dood ay ka taagan tahay doorka beesha caalamka ee muranka siyaasadeed ee Soomaaliya. Siyaasiyiin iyo falanqeeyayaal ayaa filayay in Mareykanku cadaadis ku saaro dhinacyada siyaasadda sida dhacday xilligii khilaafkii doorashada ee sanadihii 2021 iyo 2022.
Davis ayaa sheegay in mowqifka hadda ee Mareykanka uu ku saleysan yahay taageerada wada hadalka iyo xalinta khilaafaadka iyadoo aan la adeegsan cadaadis toos ah. Si kastaba, wuxuu ka digay in xaaladda siyaasadeed aysan isu beddelin rabshado ama xaalad amni darro.
Diblomaasigan ayaa sidoo kale sheegay in mucaarad nabadeed uu muhiim u yahay bulsho kasta oo dimuqraadi ah, isagoo tilmaamay in rabshadaha ka dhanka ah dibadbaxayaasha aan la aqbali karin. Wuxuu ku baaqay in dowladda iyo mucaaradku ay ku xalliyaan khilaafaadkooda wada hadal iyo tanaasul.
Mareykanka ayaa xusay in Soomaaliya ay u baahan tahay jawi siyaasadeed oo deggan si xoogga loo saaro arrimaha amniga, la dagaallanka argagixisada, kobcinta dhaqaalaha iyo soo jiidashada maalgashiga caalamiga ah.
