Wararka24: Madaxweynaha Mareykanka Donald Trump ayaa sheegay inuu si ku meel gaar ah u hakiyay howlgal militari oo lagu ilalinayey maraakiibta maraysa Marinka Hormuz, kadib hal maalin oo kaliya ay howl galeen.
Go’aankan ayaa yimid xilli ay sii kordhayaan dadaallada diblomaasiyadeed ee lagu doonayo in lagu dejiyo xiisadda u dhexeysa Washington iyo Tehran iyo awooda Iran ee sii kordheysa
Howlgalka oo Aqalka Cad ugu magac daray Project Freedom ayaa loogu talagalay in lagu xoojiyo amniga maraakiibta isticmaasha marinka Hormuz, oo ah marin muhiim u ah dhoofinta shidaalka caalamka. Trump ayaa sheegay in hakinta howlgalka ay timid kadib codsiyo uga yimid dalalka dhexdhexaadinta ka wada dagaalka, kuwaas oo uu ku sheegay inay wadaan dadaallo heshiis lagu gaari karo.
Madaxweynaha Mareykanka ayaa sheegay in inkastoo howlgalka la hakiyay, haddana cunaqabateynta saaran Iran ay weli sii socon doonto. Wuxuu tilmaamay in cadaadiska dhaqaale uu qeyb ka yahay qorshaha Washington ee lagu doonayo in Tehran lagu qanciyo heshiis siyaasadeed oo dhameystiran.
Xiisadda gobolka ayaa sii xoogeysatay kadib weerarro isdaba joog ah oo ka dhacay Marinka Hormuz, halkaas oo maraakiib iyo goobo istiraatiiji ah lagu beegsaday. Mareykanka ayaa Iran ku eedeeyay inay ka dambeysay weerarradaas, halka Tehran aysan si rasmi ah uga hadlin eedeymahaasi.
Xoghayaha Arrimaha Dibadda Mareykanka Marco Rubio ayaa sheegay in wajigii hore ee howlgalka militari ee ka dhanka ahaa Iran uu soo dhammaaday, balse difaaca danaha Mareykanka uu sii socon doono. Hakinta howlgalka ayaa loo arkaa tallaabo muujinaysa in Mareykanku doonayo inuu siiyo fursad dheeraad ah wada-hadallada siyaasadeed, iyadoo xiisadda gobolka weli taagan tahay.
