Wararka24: Madaxweynaha Soomaaliya Xasan Sheekh Maxamud ayaa maanta safar shaqo ku gaaray magaalada Kampala ee caasimadda dalka Uganda, halkaas oo uu uga qeyb-galayo munaasabadda caleemo saarka Madaxweynaha dib loo doortay ee Uganda Yoweri Museveni.
Madaxweynaha ayaa sheegay inuu kulan muhiim ah la yeeshay Yoweri Museveni, iyagoo kawada hadlay xoojinta xiriirka labada dal iyo iskaashiga dhinacyada amniga iyo la dagaallanka kooxaha hubeysan. Labada dhinac ayaa sidoo kale diiradda saaray sidii loo dardargelin lahaa iskaashiga istaraatiijiga ah ee gobolka.
Xasan Sheekh ayaa tilmaamay in Soomaaliya iyo Uganda ay leeyihiin xiriir soo jireen ah oo ku dhisan iskaashi iyo taageero dhinacyo badan leh. Wuxuu xusay muhiimadda ay leedahay sii xoojinta wada shaqeynta labada dowladood, gaar ahaan xilligan ay gobolka ka jiraan caqabado amni iyo kuwo siyaasadeed.
Madaxweynaha Soomaaliya ayaa uga mahadceliyay dowladda iyo shacabka Uganda doorka ay ku leeyihiin taageerada nabadda iyo xasilloonida Soomaaliya. Wuxuu si gaar ah u xusay ciidamada Uganda ee qeybta ka ahaa howlgalada nabad ilaalinta iyo taageerada dib u dhiska hay’adaha dowladda Soomaaliya.
Uganda ayaa kamid ah dalalka ciidamada ugu badan ku leh howlgalada Midowga Afrika ee Soomaaliya, iyadoo muddo dheer taageero militari iyo mid amni siisay dowladda federaalka. Xiriirka labada dal ayaa sanadihii dambe sii xoogeysanayay, iyadoo ay jireen kulamo iyo heshiisyo kala duwan oo dhinacyada amniga iyo dhaqaalaha la xiriira.
Safarka Madaxweynaha Soomaaliya ayaa kusoo aadaya xilli ay dowladaha gobolka geeska Afrika dadaal ugu jiraan xoojinta iskaashiga amniga iyo xasilinta gobolka. Waxaa sidoo kale la filayaa in madaxda kasoo qeyb galeysa munaasabadda Kampala ay yeeshaan kulamo gaar ah oo ku saabsan arrimaha gobolka.
