Wararka24: Madaxweynaha Israa’iil Isaac Herzog ayaa magaalada Qudus ku qaabilay safiirkii ugu horreeyay ee ay Somaliland u magacowdo dal dibadeed,Safiirka aya waraaqihiisa aqoonsiga diblomaasiyadeed u gudbiyay Madaxweynaha.
Safiirka cusub ee Somaliland u fadhiya Israa’iil, Maxamed Xaaji, ayaa noqday ergaygii ugu sarreeyay ee maamulkaas u fadhiya Tel Aviv, iyadoo tallaabadan ay kusoo aadeyso xilli xiriirka u dhexeeya labada dhinac uu si weyn usoo xoogeysanayo. Madaxweynaha Israa’iil ayaa sheegay in iskaashiga cusub uu muhiim u yahay labada dhinac, isla markaana uu horseedi karo wada-shaqeyn dhinacyo badan leh.
Maxamed Xaaji oo la hadlay warbaahinta ayaa sheegay in xiriirka Somaliland iyo Israa’iil uu yahay mid istiraatiiji ah, wuxuuna xusay in labada dhinac ay ka wada shaqeyn doonaan arrimaha horumarinta, amniga, dhaqaalaha iyo xiriirka shacabka. Wuxuu sidoo kale sheegay in shacabka Somaliland ay uga mahadcelinayaan Israa’iil taageerada ay siisay maamulkaas.
Dhankiisa, Wasiirka Arrimaha Dibadda Israa’iil Gideon Sa’ar ayaa isna qaabilay safiirka cusub, isaga oo ugu hambalyeeyay munaasabadda 18-ka May ee Somaliland. Dowladda Israa’iil ayaa bishii lasoo dhaafay sidoo kale magacowday safiirkii ugu horreeyay ee u fadhiya Somaliland.
Arrintan ayaa dhalisay falcelin xooggan oo siyaasadeed, iyadoo Dowladda Federaalka Soomaaliya ay si adag uga hortimid tallaabada ay Israa’iil ku aqoonsatay Somaliland. Sidoo kale, Midowga Afrika iyo Jaamacadda Carabta ayaa muujiyay walaac ku saabsan saameynta ay arrintan ku yeelan karto midnimada dhuleed ee Soomaaliya.
Mareykanka iyo Midowga Yurub ayaa iyaguna sheegay inay sii wadi doonaan taageerada ay u hayaan madax-bannaanida iyo wadajirka dhuleed ee Soomaaliya, inkasta oo xiriirka Israa’iil iyo Somaliland uu galay marxalad cusub oo diblomaasiyadeed.
