Wararka24: Madaxweynaha Somaliland, Cabdiraxmaan Maxamed Cabdullaahi Cirro ayaa khudbad uu ka jeediyay munaasabadda 18-ka May ku sheegay in Somaliland ay gaartay guul weyn oo dhanka aqoonsiga ah, xilli la xusayay sanad guurada 35-aad ee kasoo wareegtay markii ay ku dhawaaqday gooni isu taagga.
Munaasabadda oo si weyn looga dabaaldegay magaalooyinka Somaliland ayaa Madaxweyne Cirro wuxuu sheegay in sanadkan uu yahay kii ugu horreeyay ee 18-ka May loo xuso iyadoo Somaliland ay tahay “Jamhuuriyad la aqoonsan yahay,” sida uu hadalka u dhigay. Wuxuu tilmaamay in maamulka Somaliland uu kasoo baxay marxalado adag, islamarkaana uu dhisay nidaam dowladeed iyo hannaan dimuqraadi ah.
Cirro ayaa sheegay in Somaliland ay buuxisay shuruudihii looga baahnaa dowlad leh sharci, nabad iyo xuduudo la yaqaan, isaga oo xusay inay sii wadi doonaan dadaallada lagu xoojinayo qarannimada iyo horumarka maamulkaasi. Wuxuu sidoo kale ku tilmaamay Somaliland dal cusub oo kusoo biiray qowmiyadda Soomaaliyeed.
Madaxweynaha Somaliland ayaa farriin u diray Midowga Afrika iyo dowladaha qaaradda, isaga oo ugu baaqay inay ka fiirsadaan dhibaatooyinka ka dhasha isku haynta dalal aan wada shaqeyn karin. Wuxuu sheegay in loo baahan yahay in xal waara laga gaaro khilaafaadka siyaasadeed ee ka jira Geeska Afrika.
Dhanka kale, hadalka Cirro ayaa kusoo aadaya iyadoo maalmihii lasoo dhaafay ay jireen warar la xiriira xiriirka diblomaasiyadeed ee Somaliland la sameysaneyso dalal kala duwan, gaar ahaan xiriirka ay la leedahay Israel. Wararkaasi ayaa sii kordhiyay doodaha ku saabsan mustaqbalka siyaasadeed ee Somaliland iyo dadaallada ay ugu jirto raadinta aqoonsi caalami ah.
Munaasabadda sanadkan ayaa ahayd mid si weyn looga dareemay gudaha Somaliland, iyadoo kumannaan qof ay ka qeybgaleen dabaaldegyo, isu soo baxyo iyo bandhigyo lagu muujinayay taageerada maamulka iyo xuska 18-ka May.
