Wararka24: Dibadbax ballaaran oo looga soo horjeedo dhaq-dhaqaaqyada mucaaradka ayaa maanta ka dhacay degmada Kaaraan ee gobolka Banaadir, iyadoo ay kasoo qeybgaleen boqolaal shacab ah oo ka kala yimid degmooyinka waqooyiga magaalada Muqdisho.
Dadka dibadbaxa sameeyay ayaa isugu soo baxay waddooyinka muhiimka ah ee degmada, iyagoo ku dhawaaqayay erayo ay uga soo horjeedaan mucaaradka dowladda federaalka. Bannaanbaxa ayaa yimid maalin kadib markii mucaaradku ay dibadbax kale ka sameeyeen qaybo kamid ah caasimadda.
Qaar kamid ah shacabka ka qeybgalay isu soo baxa ayaa sheegay in aysan aqbali doonin qalalaase ama xaalad amni darro oo laga abuuro deegaanadooda. Waxay sheegeen inay ka hortagi doonaan cid kasta oo isku dayda inay colaad iyo fowdo ka abuurto waqooyiga Muqdisho.
Dibadbaxayaasha ayaa sidoo kale farriimo u diray siyaasiyiinta mucaaradka ee ku sugan aagga Mirinaayo, iyagoo sheegay in aan la oggolaan doonin falal lagu qalqal gelinayo amniga guud ee magaalada. Dadka qaar ayaa muujiyay walaac ku saabsan xiisadaha siyaasadeed ee maalmihii dambe sii kordhayay.
Maalmihii la soo dhaafay waxaa magaalada Muqdisho ka socday dhaqdhaqaaqyo siyaasadeed iyo bannaanbaxyo ay abaabuleen kooxaha mucaaradka. Mucaaradka ayaa dowladda ku eedeeyay arrimo la xiriira doorashooyinka iyo barakicinta dadka deganaa dhulalka danta guud.
Soomaaliya ayaa haatan ku jirta marxalad siyaasadeed oo xasaasi ah, iyadoo si weyn la’isugu hayo hannaanka doorashooyinka iyo wax ka beddelka dastuurka. Waxaa sidoo kale la filayaa in wada hadallo cusub ay u furmaan dowladda iyo mucaaradka, kuwaas oo la sheegay inay garwadeen ka tahay dowladda Mareykanka.
DAAWO
