Wararka24: Siyaasiyiinta mucaaradka Soomaaliya ayaa su’aal geliyay qorshaha Dowladda Federaalka Soomaaliya ee la xiriira dib-u-dejinta shacabka laga barakiciyay dhulalka danta guud ee magaalada Muqdisho, xilli muranka arrintan uu sii xoogeysanayo.
Cabdiraxmaan Cabdishakuur Warsame oo ka hadlay xaaladda taagan ayaa si adag u dhaliilay dowladda, isaga oo sheegay in tallaabooyinka socda ay muujinayaan jahawareer siyaasadeed iyo isku day lagu yareynayo cadaadiska ka dhashay burburinta guryaha shacabka.
Cabdiraxmaan Cabdishakuur ayaa sheegay in inkastoo dowladda ay ku dhawaaqday in la joojiyay burburinta dhulalka, haddana isla habeenkii la dumiyay xaafado horleh, taas oo uu ku tilmaamay tallaabo ka hor imaaneysa hadalladii dowladda.
Wuxuu sidoo kale su’aal geliyay qorshaha dowladda ee dhismaha 10 kun oo guri oo loo ballanqaaday dadka barakacayaasha ah, isaga oo sheegay in ay adag tahay in la aamino qorshe cusub oo ka imanaya isla dawladii dadka ka raraysi deegaannadooda.
Dowladda Federaalka Soomaaliya ayaa horay u sheegtay inay waddo qorshe dib-u-dejin ah oo loogu talagalay qoysaska laga raray dhulalka danta guud, iyadoo sheegtay in la hakiyay sii wadista burburinta ka socotay qaar ka mid ah degmooyinka Muqdisho.
Xiisaddan ayaa kusoo aadeysa xilli mucaaradka ay isku diyaarinayaan dibadbax weyn oo ka dhan ah dowladda, kaas oo la qorsheeyay inuu 10-ka bishan ka qabsoomo Muqdisho, waxaana la filayaa in shacabka laga raray guryahooda ay qeyb muuqata ka noqdaan isu soo baxaas.
Muranka ku saabsan dhulalka danta guud iyo dib-u-dejinta dadka barakacay ayaa noqday mid sii hurinaya khilaafka siyaasadeed ee u dhexeeya dowladda federaalka iyo mucaaradka, iyadoo xaaladda caasimadda ay weli tahay mid xasaasi ah.
