Wararka24: Taliyaha Ciidanka Xoogga Dalka Soomaaliya, Ibraahim Maxamed Maxamuud ayaa si rasmi ah magaalada Muqdisho uga furay shir ay isugu yimaadeen taliyayaasha sirdoonka dalalka xubnaha ka ah Ururka Bulshada Bariga Afrika
Shirkan oo soconaya 29-ka ilaa 30-ka April 2026 ayaa diiradda lagu saarayaa xaaladaha amniga ee gobolka Bariga Afrika iyo sidii loo xoojin lahaa iskaashiga dhinaca xogaha sirdoonka iyo la dagaallanka khataraha amni.
Mas’uuliyiinta ka qeyb-galaysa kulanka ayaa la filayaa inay si qoto dheer uga doodaan arrimo ay ka mid yihiin argagixisada, dambiyada abaabulan iyo caqabadaha amni ee sii kordhaya, kuwaas oo saameyn ku leh dalalka gobolka.
Taliyaha Ciidanka Xoogga Dalka ayaa sheegay in iskaashiga dhinaca sirdoonka uu muhiim u yahay xasilinta gobolka, isaga oo tilmaamay in khataraha amni aysan ku ekaan xuduudaha hal dal, balse ay saamayn guud ku leeyihiin gobolka oo dhan.
Sidoo kale, wuxuu ka hadlay dadaallada dowladda Soomaaliya ee dib-u-habaynta ciidamada iyo horumarka laga sameeyay xoojinta awoodda ciidanka, taas oo qayb ka ah qorshaha dowladda ee sugidda amniga gudaha iyo la dagaallanka kooxaha hubeysan.
Shirka Muqdisho ka socda ayaa loo arkaa mid muhiim u ah xoojinta wada-shaqeynta dalalka gobolka, xilli ay jirto baahi weyn oo loo qabo isku xirka howlaha sirdoonka si looga hortago khataraha soo kordhaya.
Mas’uuliyiinta ka qeyb-galaysa kulanka ayaa la filayaa inay soo saaraan qodobbo iyo talooyin lagu xoojinayo amniga gobolka iyo wada-shaqeynta dalalka xubnaha ka ah ururka.
