Wararka24: Guddoomiyaha Kubadda Cagta Soomaaliya ahna Madaxweyne Ku-xigeenka CECAFA, Cali Cabdi Maxamed, ayaa ka mid noqday 54 guddoomiye oo ka socday xiriirrada kubadda cagta Afrika kuwaas oo ka qeyb-galay shir istiraatiiji ah oo heer sare ah.
Shirkan oo lagu qabtay magaalada Vancouver ayaa hordhac u ahaa Shirweynaha 76-aad ee FIFA, kaas oo la filayo inuu dhawaan furmo.
Kulanka waxaa si wadajir ah u guddoominayay Madaxweynaha CAF Patrice Motsepe iyo Madaxweynaha FIFA Gianni Infantino, iyagoo la yeeshay wada-hadallo muhiim ah madaxda xiriirrada kubadda cagta Afrika.
Intii uu socday shirka ayaa diiradda lagu saaray horumarinta qaab-dhismeedka kubadda cagta, xoojinta maamul wanaagga, iyo sidii xiriirrada xubnaha ka ah CAF ay uga faa’iideysan lahaayeen fursadaha kobaca ee ciyaaraha.
Ka qeyb-galka Guddoomiye Cali Cabdi Maxamed ayaa muujinaya doorka sii kordhaya ee Soomaaliya ee fagaarayaasha kubadda cagta Afrika iyo kuwa caalamka.
Xiriirka Kubadda Cagta Soomaaliya ayaa sanadihii dambe xoojinayay dadaallada lagu horumarinayo ciyaaraha gudaha, iyadoo la doonayo in dalka uu kaalin muuqata ku yeesho tartamada gobolka iyo kuwa caalamiga ah.
