Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa Billad Sharaf Qaran ku guddoonsiiyay Madaxweynaha Jamhuuriyadda Jabuuti, Ismaaciil Cumar Geelle, isagoo uga mahadceliyay doorkiisa muhiimka ah ee taageerada, garab istaagga iyo dadaalka joogtada ah ee uu u muujiyay shacabka iyo dowladda Soomaaliya.
Madaxweynaha ayaa sheegay in Billaddan Sharafka ah ay astaan u tahay xiriirka walaaltinimo iyo iskaashi ee ka dhexeeya labada dal, isagoo xusay in shacabka Soomaaliyeed ay si gaar ah u qadarinayaan kaalinta taariikhiga ah ee Jabuuti ka qaadatay dib u heshiisiintii Soomaaliya, gaar ahaan Shirweynihii Nabadda ee Carta.
Hadal uu ka jeediyay xafladda lagu guddoonsiinayay billadda, Madaxweyne Xasan Sheekh ayaa tilmaamay in Madaxweyne Ismaaciil Cumar Geelle uu tusaale u yahay hoggaamiye mideeya shacabka gobolka, isla markaana xoojiyay nabadda iyo iskaashiga dalalka Geeska Afrika.
Madaxweyne Xasan Sheekh ayaa hoosta ka xariiqay in xiriirka labada dal uu sii xoogeysanayo, islamarkaana Soomaaliya ay mar kasta garab taagan tahay Jabuuti sidii horeyba loogu heshiiyay iskaashi dhanka amniga, dhaqaalaha iyo siyaasadda gobolka.
