Jakarta – Madaxweynaha Indonesia, Prabowo Subianto, ayaa shacabka dalkiisa ugu baaqay in ay cabashooyinkooda ku muujiyaan si nabad ah, xilli guud ahaan dalka ay ka socdaan mudaharaadyo xooggan oo soo xoogeystay maalmahan dambe.
Khudbad uu ka jeediyay telefishinka qaranka, Prabowo ayaa uu ku adkeeyay in dowladdu ay ixtiraamayso xorriyadda hadalka iyo muujinta aragtida, balse digniin adag ka bixiyay in labilaabo rabshado ama boobka iyo burburinta hantida dadweynaha taas ayaa loo arki doona dembi qaran oo tallaabo sharci ah laga qaadi doono cid kasta oo ku kacda falalkaas.
Madaxweynaha ayaa xusay in isaga iyo baarlamaanka dalka ay ku heshiiyeen in la joojiyo kordhinta gunnooyinka xildhibaanada, arrintaas oo ahayd sababta ugu weyn ee kicisay carada shacabka. Mudahaaradyada ayaa galay maalintii afraad oo xiriir ah, iyadoo kumannaan qof ay bannaanbaxyo waaweyn ka wadaan magaalooyinka waaweyn ee Indonesia.
Prabowo ayaa ugu dambeyn shacabka ku adkeeyay in ay codkooda ku gudbiyaan si nabad ah, isagoo ku baaqay in la ilaaliyo midnimada qaranka iyo wadajirka bulshada, si loo xalliyo khilaafaadka iyadoo la dhowrayo nabadda iyo wada noolaanshaha.
