Wararka24: 20-02-2026 Iran ayaa warqad rasmi ah u dirtay Xoghayaha Guud ee Qaramada Midoobay iyo Golaha Ammaanka, iyadoo ka cabanaysa hanjabaado ay sheegtay inay uga imanayaan Maraykanka, isla markaana ku tilmaantay kuwo khatar ku ah nabadda iyo amniga caalamka.
Warqadda oo ku taariikhaysan 19 Febraayo 2026, kuna socota Xoghayaha Guud António Guterres iyo Madaxweynaha Golaha Ammaanka James Kariuki, ayaa lagu sheegay in hadalladii u dambeeyay ee Madaxweynaha Maraykanka, Donald Trump, ay jebinayaan Axdiga Qaramada Midoobay iyo shuruucda caalamiga ah.
Iran ayaa xustay qoraal uu Trump ku baahiyay baraha bulshada 18 Febraayo, kaas oo uu ku sheegay in haddii Tehran diido inay heshiis gaarto, Maraykanku isticmaali karo saldhigga Diego Garcia iyo garoonka Fairford si loo qaado weerar ka dhan ah Iran.
Danjiraha Iran u fadhiya Qaramada Midoobay, Amir Saeid Iravani, ayaa sheegay in hanjabaadaha adeegsiga xoogga aysan noqon karin hab diblomaasiyadeed oo la aqbali karo, wuxuuna ugu baaqay Golaha Ammaanka inuu qaado tallaabo degdeg ah si looga hortago xaalad sii kacsan oo u gudbi karta iska horimaad militari oo saameeya gobolka iyo caalamka.
Iran ayaa mar kale sheegtay inaysan doonayn dagaal, balse haddii la weeraro ay adeegsan doonto xaqeeda is-difaaca ee ku cad Qodobka 51-aad ee Axdiga Qaramada Midoobay, iyadoo tilmaantay in saldhigyada iyo hantida cid kasta oo weerar qaadda ay noqon doonaan bartilmaameed sharci ah.
Tehran ayaa sidoo kale sheegtay inay weli ka go’an tahay in xal diblomaasiyadeed laga gaaro arrimaha nukliyeerka, isla markaana ay rajaynayso in cunaqabataynta laga qaado, iyada oo ku celisay inay diyaar u tahay wada-hadallo lagu yareynayo xiisadda sii kordhaysa.
