Beijing – Madaxweynaha Shiinaha, Xi Jinping, ayaa sheegay in Ururka Iskaashiga Shanghai (SCO) uu qaadayo mas’uuliyad culus oo ku saabsan ilaalinta nabadda gobolka iyo horumarinta dalalka xubnaha ka ah ururkan. Hadalkan ayuu ka jeediyay casho sharaf loogu sameeyay magaalada Tianjin, halkaas oo ay ka qaybgalayaan madax ka kala socota in ka badan 20 dal iyo 10 urur caalami ah
Xi Jinping ayaa tilmaamay in SCO uu noqday mid ka mid ah ururrada ugu saameynta badan caalamka, maadaama uu ka kooban yahay 26 dal oo metela ku dhowaad kala bar dadka dunida iyo afar meelood hal meel dhaqaalaha caalamka. Wuxuu ku adkeystay in shirweynaha Tianjin uu noqon doono guul buuxda, isla markaana uu kaalin weyn ka qaadan doono xoojinta midnimada, iskaashiga iyo horumarka dalalka xubnaha ka ah.
Madaxweynaha Shiinaha ayaa ku nuux-nuuxsaday in iskaashiga dhaqaale, amni iyo mid siyaasadeed ee ka dhaxeeya xubnaha SCO uu yahay fursad weyn oo lagu xoojinayo degganaanshaha gobolka, isla markaana wax weyn ka tari kara horumarka guud ee caalamka.
