Wararka24: 13-02-2026 Ciidamada ammaanka Kenya ayaa ku xiray Cabdinaasir Cige (Naasir Cige) garoonka diyaaradaha caalamiga ah ee Jomo Kenyatta (JKIA), kadib markii lagu eedeeyay falal la xiriira khiyaano maaliyadeed.
Booliska Kenya ayaa sheegay in Naasir Cige, oo horey u soo noqday la-taliyihii Ra’iisul Wasaaraha Soomaaliya Xamza Cabdi Barre, isla markaana sheegta inuu u sharaxan yahay xilka madaxweynaha Soomaaliya, lagu qabtay Terminal 1A xilli uu kasoo degayay diyaarad ay leedahay Kenya Airways oo ka timid Australia, kana soo martay Johannesburg.
War-saxaafadeed ka soo baxay Taliska Booliska Kenya ayaa lagu sheegay in 37-jirkan oo heysta dhalashada Soomaaliya iyo Australia lagu soo qabtay digniin hore oo nidaamka socdaalka lagu geliyay 30-kii Janaayo 2026, taasoo la xiriirtay eedeyn ku saabsan “helid lacag qaab khiyaano ah.”
Mas’uulkan ayaa markii hore lagu hayay saldhigga booliska garoonka JKIA, ka hor inta aan loo gudbin Waaxda Dambi-baarista Kenya (DCI) si baaritaan dheeraad ah loogu sameeyo.
Dhankiisa, Naasir Cige ayaa muuqaal uu ku baahiyay baraha bulshada ku sheegay in xariggiisu yahay mid siyaasadeed, isagoo ku eedeeyay Dowladda Federaalka Soomaaliya inay ka dambeyso tallaabada lagu xiray. Waxa uu sidoo kale sheegay in lagu hayo laanta la-dagaallanka argagixisada Kenya, hase yeeshee booliska Kenya ayaa si cad u beeniyay arrintaas, iyagoo sheegay in kiisku yahay mid la xiriira dembi maaliyadeed oo horey loogu daba socday.
Mas’uuliyiinta Kenya ayaa xaqiijiyay in baaritaanka kiiskan uu weli socdo, isla markaana eedeysanaha la horgeyn doono maxkamad marka baaritaannada hordhaca ah la dhammeeyo
