Muqdisho (Wararka24) – Ciidamada Amniga ee dowladda Soomaaliya ayaa digniin culus u diray dadka wax ku qora baraha bulshada ee lagu tuhunsan yahay inay si dadban ula shaqeynayaan maleeshiyada Al Shabaab, iyagoo faafinaya warar lagu qalqalgelinayo amniga caasimadda Muqdisho, Macalin Mahdi.
Taliyaha Qaybta Booliska Gobolka Banaadir, Korneyl Mahdi Cumar Muumin, ayaa si adag u sheegay inaan la aqbali doonin in qofna uu bartiisa bulshada ka dhigo goob lagu taageero ama lagu faafiyo warar been abuur ah oo ka faa’iideynaya kooxaha argagixisada.
“Cid laga aqbalayo ma jirto inay barrahooda bulshada ku soo qorto been abuur ay ku saacideyso Khawaarijta. Marnaba ma aqbalayno!” ayuu yiri taliyaha, isagoo carrabka ku adkeeyay in tallaabo adag laga qaadi doono cid kasta oo falkaasi lagu helo.
Macalin Mahdi ayaa xusay in aysan indhaha ka laaban doonin dadka wax ku qora baraha bulshada ee shacabka qalqalgelinaya.
“Wiil Xamar jooga oo hotel dhex fadhiya oo wax macno lahayn qoraya si uu shacabka caasimadda ugu argagixiyo, arrintaasi lagama yeelayo! Asaga hadda dhiig kama socdee, dhididaa ka keenaynaa, qol mugdi ah ayaan ku xiraynaa!” ayuu yiri taliyaha, isagoo hadalkaasi ka jeediyay kulan afur wadareed ah oo xalay lagu qabtay xaafadda Taleex ee Degmada Hodan.
Maamulka Gobolka Banaadir Oo Garab Istaagay Macalin Mahdi
Guddoomiyaha Kuxigeenka Amniga & Siyaasadda ee Maamulka Gobolka Banaadir, Maxamed Axmed Diiriye (Yabooh), oo isna ka hadlay kulanka, ayaa sheegay in aysan dooneyn in cidna afka u furto Al Shabaab, isagoo bulshada uga digay inay faafiyaan warar ay wax ku qalqalgelinayaan.
“Waxaan xoojinayaa warka Taliyaha Qaybta Guud, oo uu lahaa ammaanka ciyaar ciyaar ma galo. Maamulka Gobolka Banaadir, laamaha amniga iyo shacabka dhammaantayo waxaan u taaganahay horumarka, ammaanka iyo dowladnimada Muqdisho.”
Yabooh ayaa shacabka ku booriyay inay la shaqeeyaan hay’adaha amniga, isagoo sheegay in Al Shabaab ay yihiin cadowga nabadda.
Digniintan ayaa timid saacado un kadib markii Golaha Wasiirada ay soo saareen go’aamo adag oo lagu xoojinayo dagaalka ka dhanka ah maleeshiyada Al Shabaab. Golaha ayaa shacabka uga digay inaysan la macaamilin kooxaha argagixisada, isla markaana ay ka fogaadaan goobaha ay ku sugan yihiin, si aysan waxyeello ugu geysan duqeymaha cirka ah ee lagu beegsanayo xarumaha argagixisada.
Ciidamada Amniga ayaa ballan qaaday in ay si dhow ula socdaan dadka faafinaya wararka been abuurka ah, iyagoo uga digay in ay wajihi doonaan ciqaab culus.
Digniintaan ayaa timid markii 2dii bishaan marso Laxiray Weriye Cali Aadan Muumin, oo ka mid ah suxufiyiinta si weyn looga yaqaan caasimadda Muqdisho, Qoraal ka soo baxay Taliska Qaybta Booliska Gobolka Banaadir ayaa lagu sheegay in wariyaha loo haysto eedeymo la xiriira amni-darro iyo hadalo aflagaado ah oo uu mas’uuliyiinta DF Ku aflagaadeeyey.
Cali aadan ayaa hada lasoo daayey kana mid ahaa dhalinyaradi xali kasoo qeyb galey afurki kadhacay degmada hodan, Ee ay masuulIyiinta Ciidamada Amniga ugu hadleen Amniga caasimada Muqdisho iyo guud ahaan dalka….
