Golaha Wasiirrada Oo Soo Saartay Go’aanno Culus, Digniin Adagna U Diray Shacabka + Faahfaahin

Wararka Ugu Aqrintabadan

Wasiir Fiqi Oo Ka Jawaabay Eedeymihii dilka ahaa oo Sanbaloolshe ujeediyay Dowladda

7 hours ago

Guddiga Xuquuqul Insaanka Oo Cambaareeyay Dilalka Ka Dhacay Sool Iyo Hiiraan

7 hours ago

Load More

Wararka24: Golaha Wasiirrada Soomaaliya ayaa shir ay yeesheen, oo uu guddoominayey Ra’iisul Wasaare Ku-xigeenka ahna Ku-simaha Ra’iisul Wasaaraha, Saalax Axmed Jaamac, waxa ay kasoo saareen go’aanno culus oo la xiriira sugidda amniga dalka.

Kulanka Golaha Wasiirrada ayaa diiradda lagu saaray dardargelinta dagaalka lagula jiro kooxaha Khawaarijta, iyadoo la bogaadiyey guulaha ay soo hooyeen ciidamada Qaranka iyo geesiyaasha deegaanka ee ka qeyb qaadanaya dagaalka lagula jiro argagixisada.

Go’aannada Ay Soo Saareen Golaha Wasiirrada

1. Bogaadin Ciidan: Golaha Wasiirrada ayaa si weyn u bogaadiyey guulaha ay ciidamada Qaranka iyo ciidamada madaniga ah ka gaareen dagaalka Khawaarijta, iyagoo dhiirrigeliyey dadaallada socda.
2. Mamnuucista Wararka Been Abuurka Ah: Dowladda Soomaaliya ayaa mar kale xusuusisay muwaadiniinta in ay mamnuuc tahay faafinta wararka been abuurka ah ee la xiriira amniga dalka, taasoo lagu baahiyo warbaahinta iyo baraha bulshada. Qofkii lagu helo fal noocan ah waxa uu wajahaya tallaabo sharci ah oo adag, waxaana lagu ciqaabi doonaa si waafaqsan sharciga dalka.
3. Ciqaabta Dadka Ku Lug Yeelanaya Falal Argagixisanimo: Waxaa sidoo kale go’aanka lagu xusay in qof kasta oo u ogolaada in gurigiisa, goobtiisa ganacsi ama gaadiidkiisa lagu fuliyo falal amniga wax u dhimaya, lala tiigsan doono sharci adag. Sida ku cad xeerka ka hortagga iyo la dagaallanka argagixisada, qofkaas waxa uu la mid noqonayaa qof si toos ah uga qeyb qaatay falal argagixisanimo.
4. Digniin Ku Socota Shacabka: DFS ayaa mar kale uga digtay shacabka Soomaaliyeed ee ku sugan deegaannada iyo tuulooyinka ay ku sugan yihiin argagixisada in ay si degdeg ah uga fogaadaan. Dowladda ayaa sare u qaaday howlgalka dhanka cirka iyo dhulka ah, si meesha looga saaro Khawaarijta banneysatay dhiigga shacabka.
5. Xoojinta Amniga Garoonka Aadan Cadde: Dowladda ayaa sidoo kale go’aamisay in aan wax hub iyo gaadiid dagaal lala geli karin xeyndaabka Garoonka Diyaaradaha Aadan Cabdulle ee Muqdisho. Laamaha amniga ayaa dhowaan faahfaahin ka bixin doona sida go’aankan loo dhaqan gelin doono.

Go’aannadan cusub ayaa kusoo aadaya xilli dowladda ay sare u qaaday dagaalka ka dhanka ah kooxaha argagixisada, iyadoo guulo muhiim ah laga gaaray gobollada Shabeellaha Dhexe iyo Hiiraan. DFS ayaa horey u muujisay sida ay uga go’an tahay xaqiijinta amniga iyo xasilloonida dalka.

Wararka manta