Wararka laga helay Gobolka Shabellaha Hoose ayaa sheegaya in maleeshiyada Al-Shabaab ay waaberigii hore ee saaka weerar culus ku qaadteen deegaannada Sabiid iyo Caanoole ee gobolkaasi.
Wararka ayaa intaa ku daray in qaraxyo xoogan laga maqlay deegaannadaasi, ka hor inta aysan maleeshiyada weerar toos ah ku qaadin Xerada Ciidanka Xoogga Dalka ay ku leeyihiin deegaanka Sabiid.
Dadka deegaanka ayaa sheegay in wax yar uun ka dib xilligii Salaadda Subax ay xabaddu is qabsatay deegaannadaasi oo hoostaga Degmada Afgooye, welina uu dagaalku socdo.
Ciidanka Guutada 14-ka October oo lagu xoojiyay tiro ka mid ah Kumaandooska Gorgor ayaa degan Sabiid, waxayna iyaga iyo kuwa kale ee ku sugan Caanoole ay sameynayaan iska caabin ay dib isaga riixayaan colkaasi soo hujuumay.
Wararka ayaa intaasi ku daray in maleeshiyaad kale oo Al-Shabaab ka tirsan ay jidka u galeen ciidan gurmad ahaa oo ka yimid dhinaca Degmada Awdheegle.
Ilo wareedyo ayaa sheegay in qarax lagu aasay waddada dhinaceeda uu qabsaday gaari Cabdi Bile ahaa, oo ay la socdeen ciidan uu hoggaaminayay Kabtan Maxamed Nuur (Jareere), Abaanduulaha Ururka Awdheegle ee Guutada 14-ka October.
Ilo wareedyada ayaa sheegay in Abaanduulaha iyo dhowr askari oo kale ay ku dhinteen qaraxaasi.\
Xaaladda deegaannada Sabiid iyo Caanoole ee Gobalka Shabellaha Hoose,
Xaaladda Sabiid iyo Caanoole ee Gobalka Shabellaha Hoose, ayaa saaka ah mid aad u kacsan, iyadoo welina ay xabaddu ka socoto.
Al-Shabaab waxay sheegtay in maleeshiyadeeda ay dagaal kula wareegeen gacan ku haynta Sabiid, balse ma jirto cid xaqiijin karta sheegashadooda.
Dadka deegaanka ayaa ku sheegay in dagaalka saaka ka socda Sabiid uu ka culus yahay midkii 1-dii bishii May ee sanadkii 2024 ka dhacay deegaankaasi, markaas oo Al-Shabaab ay weerareen.
Ujeeddada Al-Shabaab iyo dardargelinta dagaalka
Al-Shabaab ayaa isku dayaysa inay Dowladda Federaalka aag dagaal kaga furaan Gobolka Shabellaha Hoose, si ay isaga qafiifiyaan cadaadiska militari ee ka haysto Gobolka Shabellaha Dhexe.
Madaxweynaha Soomaaliya, Xasan Sheekh Maxamuud, oo ahmiyad gaar ah siinaya hawlgalka Hirshabelle, ayaa waxaa suurtagal ah in saacadaha soo socdo uu dib ugu laabto jiidaha hore.
Madaxweyne Xasan Sheekh ayaa xalay fiidkii ku laabtay Magaalada Muqdisho, ka dib safar uu Talaadadii ku tegay Gobolada Shabellaha Dhexe iyo Hiiraan. Madaxweynaha ayaa la filayaa in uu gaaro Degmada Cadale ee Gobolka Shabellaha Dhexe.
📌 Wararka24 – Xog rasmi ah oo faahfaahin degdeg ah
